Pratītyasamutpādāvadāna · Chapter 75

sarvam avidyāmūlaṃ saṃsārataruprakāravaicitryam /
jñātum vaktuṃ hantuṃ kaḥ śakto 'nyatra sarvajñāt

śrāvastyāṃ svastimān pūrvaṃ jino jetavane sthitaḥ /
aśeṣadarśī bhagavān bhikṣusaṃgham abhāṣata

śṛṇuta śreyase jñānālokanirmalamānasāḥ /
pratītyasamutpādaṃ vaḥ kathayāmi yathākramam

avidyāvāsanaiveyaṃ duḥkhaskandhasya bhūyasaḥ /
saṃsāraviṣavṛkṣasya mūlabandhavidhāyinī

tatpratyayas tu saṃskārāḥ kāyavāṅmānasātmakāḥ /
saṃskārotthaṃ ca vijñānaṃ manaḥṣaṣṭhendriyātmakamn

tatpratyayaṃ nāmarūpaṃ saṃjñāsaṃdarśanābhidham /
manaḥṣaṣṭhendriyasthānaṃ ṣaḍāyatanam apy ataḥ

ṣaḍāyatanasaṃśleṣaḥ sparśa ity abhidhīyate /
ṣaṭsparśānubhavo yaś ca vedanā sā prakīrtitā

tayā viṣayasaṃkleśarāgāt tṛṣṇā prajāyate /
kāmādiṣu tadudbhūtam upādānaṃ pravartate

upādānodbhavaḥ kāmarūpārūpyamayo bhavaḥ /
nānāyoniparāvṛttyā jātir bhavasamudbhavā

jarāmaraṇaśokādisaṃtatir jātisaṃśrayā /
avidyādinirodhena teṣāṃ vyuparamakramaḥ

pratītyotpādo 'yaṃ bahugatir avidyākṛtapadaḥ
sa cintyo yuṣmābhir vijanavanaviśrāmaśamibhiḥ /
parijñātaḥ samyag vrajati kila kālena tanutāṃ
tanutvaṃ saṃprāptaḥ sukhataranivāryaś ca bhavati