પ્રતીત્યસમુત્પાદાવદાન · અધ્યાય 75

સર્વમ્ અવિદ્યામૂલં સંસારતરુપ્રકારવૈચિત્ર્યમ્ ।
જ્ઞાતુમ્ વક્તું હન્તું કઃ શક્તો ઽન્યત્ર સર્વજ્ઞાત્

શ્રાવસ્ત્યાં સ્વસ્તિમાન્ પૂર્વં જિનો જેતવને સ્થિતઃ ।
અશેષદર્શી ભગવાન્ ભિક્ષુસંઘમ્ અભાષત

શૃણુત શ્રેયસે જ્ઞાનાલોકનિર્મલમાનસાઃ ।
પ્રતીત્યસમુત્પાદં વઃ કથયામિ યથાક્રમમ્

અવિદ્યાવાસનૈવેયં દુઃખસ્કન્ધસ્ય ભૂયસઃ ।
સંસારવિષવૃક્ષસ્ય મૂલબન્ધવિધાયિની

તત્પ્રત્યયસ્ તુ સંસ્કારાઃ કાયવાઙ્માનસાત્મકાઃ ।
સંસ્કારોત્થં ચ વિજ્ઞાનં મનઃષષ્ઠેન્દ્રિયાત્મકમ્ન્

તત્પ્રત્યયં નામરૂપં સંજ્ઞાસંદર્શનાભિધમ્ ।
મનઃષષ્ઠેન્દ્રિયસ્થાનં ષડાયતનમ્ અપ્ય્ અતઃ

ષડાયતનસંશ્લેષઃ સ્પર્શ ઇત્ય્ અભિધીયતે ।
ષટ્સ્પર્શાનુભવો યશ્ ચ વેદના સા પ્રકીર્તિતા

તયા વિષયસંક્લેશરાગાત્ તૃષ્ણા પ્રજાયતે ।
કામાદિષુ તદુદ્ભૂતમ્ ઉપાદાનં પ્રવર્તતે

ઉપાદાનોદ્ભવઃ કામરૂપારૂપ્યમયો ભવઃ ।
નાનાયોનિપરાવૃત્ત્યા જાતિર્ ભવસમુદ્ભવા

જરામરણશોકાદિસંતતિર્ જાતિસંશ્રયા ।
અવિદ્યાદિનિરોધેન તેષાં વ્યુપરમક્રમઃ

પ્રતીત્યોત્પાદો ઽયં બહુગતિર્ અવિદ્યાકૃતપદઃ
સ ચિન્ત્યો યુષ્માભિર્ વિજનવનવિશ્રામશમિભિઃ ।
પરિજ્ઞાતઃ સમ્યગ્ વ્રજતિ કિલ કાલેન તનુતાં
તનુત્વં સંપ્રાપ્તઃ સુખતરનિવાર્યશ્ ચ ભવતિ