Parātriṃśikā with Abhinavagupta's Parātriṃśikāvivaraṇa (with commentary) · Verses 0.1 -4

anuttaraṃ kathaṃ deva sadyaḥkaulikasiddhidam
yena vijñātamātreṇa khecarīsamatāṃ vrajet //

etad guhyaṃ mahāguhyaṃ kathayasva mama prabho

hṛdayasthā tu yā śaktiḥ kaulinī kulanāyikā //

tāṃ me kathaya deveśa yena tṛptiṃ labhāmy aham

śṛṇu devi mahābhage uttarasyāpy anuttaram //

yad ayaṃ kauliko vidhir mama hṛdvyomny avasthitaḥ
kathayāmi na saṃdehaḥ sadyaḥ kaulikasiddhidam //

athādyās tithayaḥ sarve svarā bindvavasānakāḥ
tadantaḥ kālayogena somasūryau prakīrtitau //

pṛthivyādīni tattvāni puruṣāntāni pañcasu
kramāt kādiṣu vargeṣu makārānteṣu suvrate //

vāyvagnisalilendrāṇāṃ dhāraṇānāṃ catuṣṭayam
tadūrdhve śādivikhyātaṃ purastād brahmapañcakam //

amūlā tatkramā jñeyā kṣāntā sṛṣṭir udāhṛtā
sarveṣāṃ caiva mantrāṇāṃ vidyānāṃ ca yaśasvini //

iyaṃ yoniḥ samākhyātā sarvatantreṣu sarvadā

svātantryaikarasāveśacamatkāraikalakṣaṇā /
parā bhagavatī nityaṃ bhāsate bhairavī svayam //

tasyāḥ svabhāsāyogo yaḥ so 'niruddhaḥ sadoditaḥ /
sadāśivadharātiryaṅnīlapītasukhādibhiḥ //

bhāsamānaiḥ svasvabhāvaiḥ svayaṃprathanaśālibhiḥ /
prathate saṃvidākāraḥ svasaṃvedanasārakaḥ //

svasvasaṃvedanaṃ nāma pramāṇam iti varṇyate /
bālatiryaksarvavidāṃ yat sāmyenaiva bhāsate //