પરાત્રિંશિકા (ટીકા સહિત) · શ્લોક 0.1 -4

અનુત્તરં કથં દેવ સદ્યઃકૌલિકસિદ્ધિદમ્
યેન વિજ્ઞાતમાત્રેણ ખેચરીસમતાં વ્રજેત્ ॥

એતદ્ ગુહ્યં મહાગુહ્યં કથયસ્વ મમ પ્રભો

હૃદયસ્થા તુ યા શક્તિઃ કૌલિની કુલનાયિકા ॥

તાં મે કથય દેવેશ યેન તૃપ્તિં લભામ્ય્ અહમ્

શૃણુ દેવિ મહાભગે ઉત્તરસ્યાપ્ય્ અનુત્તરમ્ ॥

યદ્ અયં કૌલિકો વિધિર્ મમ હૃદ્વ્યોમ્ન્ય્ અવસ્થિતઃ
કથયામિ ન સંદેહઃ સદ્યઃ કૌલિકસિદ્ધિદમ્ ॥

અથાદ્યાસ્ તિથયઃ સર્વે સ્વરા બિન્દ્વવસાનકાઃ
તદન્તઃ કાલયોગેન સોમસૂર્યૌ પ્રકીર્તિતૌ ॥

પૃથિવ્યાદીનિ તત્ત્વાનિ પુરુષાન્તાનિ પઞ્ચસુ
ક્રમાત્ કાદિષુ વર્ગેષુ મકારાન્તેષુ સુવ્રતે ॥

વાય્વગ્નિસલિલેન્દ્રાણાં ધારણાનાં ચતુષ્ટયમ્
તદૂર્ધ્વે શાદિવિખ્યાતં પુરસ્તાદ્ બ્રહ્મપઞ્ચકમ્ ॥

અમૂલા તત્ક્રમા જ્ઞેયા ક્ષાન્તા સૃષ્ટિર્ ઉદાહૃતા
સર્વેષાં ચૈવ મન્ત્રાણાં વિદ્યાનાં ચ યશસ્વિનિ ॥

ઇયં યોનિઃ સમાખ્યાતા સર્વતન્ત્રેષુ સર્વદા

સ્વાતન્ત્ર્યૈકરસાવેશચમત્કારૈકલક્ષણા ।
પરા ભગવતી નિત્યં ભાસતે ભૈરવી સ્વયમ્ ॥

તસ્યાઃ સ્વભાસાયોગો યઃ સો ઽનિરુદ્ધઃ સદોદિતઃ ।
સદાશિવધરાતિર્યઙ્નીલપીતસુખાદિભિઃ ॥

ભાસમાનૈઃ સ્વસ્વભાવૈઃ સ્વયંપ્રથનશાલિભિઃ ।
પ્રથતે સંવિદાકારઃ સ્વસંવેદનસારકઃ ॥

સ્વસ્વસંવેદનં નામ પ્રમાણમ્ ઇતિ વર્ણ્યતે ।
બાલતિર્યક્સર્વવિદાં યત્ સામ્યેનૈવ ભાસતે ॥