Paniniya Shiksha · Chapter p8

svarāṇāmūṣmaṇāṃ caiva vivṛtaṃ karaṇaṃ smṛtam /
tebhyo'pi vivṛtāveṅau tābhyāmaicau tathaiva ca

anusvārayamānāṃ ca nāsikā sthānamucyate /
ayogavāhā vijñeyā āśrayasthānabhāginaḥ

alābuvīṇānirghoṣo dantyamūlyasvarānanu /
anusvārastu kartavyo nityaṃ hroḥ śaṣaseṣu ca

anusvāre vivṛttyāṃ tu virāme cākṣaradvaye /
dviroṣṭhyau tu vigṛhṇīyādyatrokāravakārayoḥ

vyāghrī yathā haretputrāndaṃṣṭrābhyāṃ na ca pīḍayet /
bhītā patanabhedābhyāṃ tadvadvarṇānprayojayet