Paniniya Shiksha · Chapter p5

cāṣastu vadate mātrāṃ dvimātraṃ tveva vāyasaḥ /
śikhī rauti trimātraṃ tu nakulastvardhamātrakam

kutīrthādāgataṃ dagdhamapavarṇaṃ ca bhakṣitam /
na tasya pāṭhe mokṣo'sti pāpāheriva kilbiṣāt

sutīrthādagataṃ vyaktaṃ svāmnāyyaṃ suvyavasthitam /
susvareṇa suvaktreṇa prayuktaṃ brahma rājate

mantro hīnaḥ svarato varṇato vā mithyā prayukto na tamarthamāha /
sa vāgvajro yajamānaṃ hinasti yathendraśatruḥ svaratoparādhāt

anakṣaraṃ hatāyuṣyaṃ visvaraṃ vyādhipīḍitam /
akṣatāśśastrarūpeṇa vajraṃ patati mastake

hastahīnaṃ tu yo'dhīte svaravarṇavivarjitam /
ṛgyajuḥsāmabhirdagdho viyonimadhigacchati

hastena vedaṃ yo'dhīte svaravarṇarthasaṃyutam /
ṛgyajuḥ sāmabhiḥ pūto brahmaloke mahīyate