pāṇḍava gītā · Chapter 1

.. .
. pāṇḍava gītā .. .
.
pāṇḍava prahlādanāradaparāśarapuṇḍarīka-
vyāsāmbarīśaśukaśaunakabhīṣmadālbhyān / .
rukmāṅgadārjunavasiṣṭhavibhīṣaṇādīn
puṇyānimānparamabhāgavatānsmarāmi .. १..
lomaharṣaṇa uvāca -
dharmo vivirdhati yudhiṣṭhirakīrtanena
pāpaṃ praṇaśyati vṛkodarakīrtanena /.
śatrurvinaśyati dhanañjayakīrtanena
mādrīsutau kathayatāṃ na bhavanti rogāḥ .. २..
brahmā uvāca -
ye mānavā vigatarāgaparāvarajñā
nārāyaṇaṃ suraguruṃ satataṃ smaranti .
dhyānena tena hatakilbiṣa cetanāste
mātuḥ payodhararasaṃ na punaḥ pibanti .. ३..
yudhiṣṭhira uvāca -
meghaśyāmaṃ pītakauśeyavāsaṃ
śrīvatsāṅkaṃ kaustubhodbhāsitāṅgam .
puṇyopetaṃ puṇḍarīkāyatākṣaṃ
viṣṇuṃ vande sarvalokaikanātham .. ४..
kuntī uvāca -
svakarmaphalanirdiṣṭāṃ yāṃ yāṃ yoniṃ vrajāmyaham .
tasyāṃ tasyāṃ hṛṣīkeśa tvayi bhaktidṛrḍhā'stu me .. ५..
drupada uvāca -
kīṭeṣu pakṣiṣu mṛgeṣu sarīsṛpeṣu
rakṣaḥpiśācamanujeṣvapi yatra yatra .
jātasya me bhavatu keśava tvatprasādāt
tvayyeva bhaktiracalā'vyabhicāriṇī me .. ६..
abhimanyu uvāca -
govinda govinda hare murāre
govinda govinda rathāṅgapāṇe .
govinda govinda mukunda kṛṣṇa
govinda govinda namo namaste .. ७..
uddhava uvāca -
vāsudevaṃ parityajya yo'nyaṃ devamupāsate .
tṛṣito jāhnavītīre kūpaṃ vāñchati durbhagaḥ .. ८..
vidura uvāca -
vāsudevasya ye bhaktāḥ śāntāstadgatamānasāḥ .
teṣāṃ dāsasya dāso'haṃ bhave janmani janmani .. ९..
bhīṣma uvāca -
viparīteṣu kāleṣu parikṣīṇeṣu bandhuṣu .
trāhi māṃ kṛpayā kṛṣṇa śaraṇāgatavatsala .. १०..
droṇa uvāca -
ye ye hatāścakradhareṇa rājaṃ-
strailokyanāthana janārdanena .
te te gatā viṣṇupuriṃ prayātāḥ
krodho'pi devasya vareṇa tulyaḥ .. ११..
gāndhārī uvāca -
tvameva mātā ca pitā tvameva
tvameva bandhuśca sakhā tvameva .
tvameva vidyā draviṇaṃ tvameva
tvameva sarvaṃ mama deva deva .. १२..
prahlāda uvāca -
nātha yonisahasreṣu yeṣu yeṣu vrajāmyaham .
teṣu teṣvacalā bhaktiracyuta'su sadā tvayi .. १३..
yā prītiravivekanāṃ viṣayeṣvanapāyini .
tvāmanusmarataḥ sā me hṛdayānmā'pasarpatu .. १४..
bharadvāja uvāca -
lābhasteṣāṃ jayasteṣāṃ kutasteṣāṃ parājayaḥ .
yeṣāmindīśvaraśyāmo hṛdayastho janārdanaḥ .. १५..
atri uvāca -
govindeti sadā snānaṃ govindeti sadā japaḥ .
govindeti sadā dhyānaṃ sadā govindakīrtanam .. १६..
āvirhotra uvāca -
kṛṣṇa tvadīyapadapaṅkajapañjarānte
adyaiva me viśatu mānasarājahaṃsaḥ .
prāṇaprayāṇasamaye kaphavātapitāiḥ
kaṇṭhāvarodhanavidhau smaraṇaṃ kutaste .. १७..
vidura uvāca -
hararnāmaiva nāmaiva nāmāmaiva mama jīvanam .
kalau nāsyeva nāsteva nāstyeva gatiranyathā .. १८..
vaśiṣṭha uvāca -
kṛṣṇeti maṅgalaṃ nāma yasya vāci pravartate .
bhasmībhavantu tasyāśu mahāpātakakoṭayaḥ .. १९..
duryodhana uvāca -
jānāmi dharmaṃ na ca me pravṛtti-
rjānāmyadharmaṃ na ca me nivṛttiḥ .
kenāpi devena hṛdisthitena
yathā niyukto'smi tathā karomi .. २०..
subhadra uvāca -
eko'pi kṛṣṇasya kṛtaḥ praṇāmo
daśāśvamedhāvabhṛthena tulyaḥ .
daśāśvamedhī punareti janma
kṛṣṇapraṇāmī na punarbhavāya .. २१..
garga uvāca -
nārāyaṇeti mantro'sti vāgasti vaśavartini .
tathāpi narake ghore patantītyetadadbhutam .. २२..
parāśara uvāca -
sakṛduccaritaṃ yena harirityakṣaradvayam .
baddhaḥ parikarastena mokṣāya gamanaṃ prati .. २३..
vyāsa uvāca -
satyaṃ satyaṃ punaḥ satyaṃ bhujamutthāpya cocyate .
na vedācca paraṃ śāstraṃ na devaḥ keśavātparaḥ ..२४..
dhanvantari uvāca -
acyutānanta govinda nāmoccāraṇabheṣajāt .
naśyanti sakalā rogāḥ satyaṃ satyaṃ vadāmyaham .. २५..
mārkaṇḍeya uvāca -
sā hānistanmahacchidraṃ sā cāndhajaḍamūḍhatā .
yanmuhūrtaṃ kṣaṇaṃ vāpi vāsudevaṃ na cintayet .. २६..
śrīśuka uvāca -
āloḍya sarvaśāstrāṇi vicāryaivaṃ punaḥ punaḥ .
idamekaṃ suniṣpannaṃ dhyeyo nārāyaṇaḥ sadā .. २७..
śrīmahādeva uvāca -
śarīra ca navacchidraṃ vyādhigrastaṃ kalevaram
auṣadhaṃ jāhnavītoyaṃ vaidyo nārāyaṇo hariḥ .. २८..
śaunaka uvāca -
bhojanācchādane cintāṃ vṛthā kurvanti vaiṣṇavāḥ .
yo'sau viśvambharo devaḥ sa bhaktānkimupekṣate .. २९ ..
ākāśātpatitaṃ toyaṃ yathā gacchati sāgaram .
sarvadevanamaskāraḥ keśavaṃ prati gacchati .. ३०..