Panchadashi · Chapter p13

// pañcadaśī//
atha prathamo'dhyāya://
pratyaktattvaviveka:/
tattvavivekonāma - prathamaḥ paricchedaḥ /
namaḥ śrīśaṅkarānandagurupādāmbujanmane /
savilāsamahāmohagrāhagrāsaikakarmaṇe

tatpādāmburuhadvandvasevānirmalacetasām /
sukhabodhāya tattvasya viveko'yaṃ vidhīyate

śabdasparśādayo vedyā vaicitryājjāgare pṛthak /
tatovibhaktā tatsaṃvidaikyarūpyānna bhidyate

tathā svapne'tra vedyantu na sthiraṃ jāgare sthiram /
tadbhedo'tastayoḥ saṃvidekarūpā na bhidyate

suptottthitasya sauṣuptatamobodho bhavetsmṛtiḥ /
sā cāvabuddhaviṣayāvabuddhaṃ tattadā tataḥ

sabodhoviṣayādbhinno na bodhātsvapnabodhavat /
evaṃ sthānatraye'pyekā saṃvittadvaddināntare

māsābdāyugakalpeṣu gatāgamyeṣvanekadhā /
nodeti nāstametyekā saṃvideṣā svayaṃprabhā

iyamātmā parānandaḥ parapremāspadaṃ yataḥ /
mā na bhuvaṃ hi bhūyāsamiti premātmanīkṣyate

tatpremātmārthamanyatra naivamanyārthamātmani /
atastatparamantena paramānandatātmanaḥ

itthaṃ saccitparānanda ātmā yuktyā tathāvidham /
paraṃ brahma tayoścaikyaṃ śrutyanteṣūpadiśyate

abhāne na paraṃ prema bhāne na viṣayaspṛhā /
atobhāne'pyabhātā'sau paramānandatātmanaḥ

adhyetṛvargamadhyastha putrādhyayana śabdavat /
bhāne'pyabhānaṃ bhānasya pratibandhena yujyate

pratibandho'sti bhātīti vyavahārārhavastuni /
taṃ nirasya viruddhasya tasyotpādanamucyate

tasya hetuḥ samānābhihāraḥ putradhvaniśrutau /
ihānādiravidyaiva vyāmohaikanibandhanam

cidānandamayabrahmapratibimbasamanvitā /
tamorajaḥsattvaguṇā prakṛtirdvividhā ca sā

sattvaśuddhāviśuddhibhyāṃ māyā'vidye ca te mate /
māyābimbovaśīkṛtya tāṃ syātsarvajña īśvaraḥ

avidyāvaśagastvanyastadvaicitryādanekadhā /
sā kāraṇaśarīraṃ syātprājñastatrābhimānavān

tamaḥ pradhānaprakṛtestadbhogāyeśvarājñayā /
viyatpavanatejo'mbu bhuvobhūtāni jajñire

sattvāṃśaiḥ pañcabhisteṣāṃ kramāddhīndriyapañcakam /
śrotratvagakṣirasanaghrāṇākhyāmupajāyate

tairantaḥkaraṇaṃ sarvairvṛttibhedena taddvidhā /
manovimarśarūpaṃ syādbuddhiḥ syānniścayātmikā

rajoṃ'śaiḥ pañcabhisteṣāṃ kramātkarmendriyāṇi tu /
vākpāṇipādapāyūpasthābhidhānāni jajñire

taiḥ sarvaiḥ sahitaiḥ prāṇovṛttibhedātsa pañcadhā /
prāṇo'pānaḥ samānaścodānavyānau ca te punaḥ

buddhikarmendriyaprāṇapañcakairmanasā dhiyā /
śarīraṃ saptadaśabhiḥ sūkṣmaṃ talliṅgamucyate

prājñastatrābhimānena taijasatvaṃ prapadyate /
hiraṇyagarbhatāmīśastayorvyaṣṭisamaṣṭitā

samaṣṭirīśaḥ sarveṣāṃ svātmatādātmyavedanāt /
tadabhāvāttato'nye tu kathyante vyaṣṭisaṃjñayā

tadbhogāya punarbhogyabhogāyatanajanmane /
pañcīkaroti bhagavānpratyekaṃ viyadādikam

dvidhā vidhāya caikaikaṃ caturdhā prathamaṃ punaḥ /
svasvetaradvitīyāṃśairyojanātpañca pañca te

tairaṇḍastatra bhuvanabhogyabhogāśrayodbhavaḥ /
hiraṇyagarbhaḥ sthūle'smindehe vaiśvānaro bhavet /
taijasā viśvatāṃ yātā deva tiryaṅnarādayaḥ

te parāgdarśinaḥ pratyaktattvabodhavivarjitāḥ

kurvate karma bhogāya karma kartuṃ ca bhuñjate /
nadyāṃ kīṭā ivāvartādāvartāntaramāśu te /
vrajanto janmano janma labhante naiva nirvṛtim

satkarmaparipākātte karuṇānidhinoddhṛtāḥ /
prāpya tīratarucchāyāṃ viśrāmyanti yathāsukham

upadeśamavāpyaivamācāryāttattvadarśinaḥ /
pañcakoṣavivekena labhante nirvṛtiṃ parām

annaṃ prāṇo mano buddhirānandaśceti pañca te /
koṣāstairāvṛtaḥ svātmā vismṛtyā saṃsṛtiṃ vrajet

syātpañcīkṛtabhūtottho dehaḥ sthūlo'nna saṃjñakaḥ /
liṅge tu rājasaiḥ prāṇaiḥ prāṇaḥ karmendriyaiḥ saha

sāttvikairdhīndriyaiḥ sākaṃ vimarṣātmā manomayaḥ /
taireva sākaṃ vijñānamayodhīrniścayātmikā

kāraṇe sattvamānandamayomodādivṛttibhiḥ /
tattatkoṣaistu tādātmyādātmā tattanmayo bhavet

anvayavyatirekābhyāṃ pañcakoṣa vivekataḥ /
svātmānaṃ tata uddhṛtya paraṃ brahma prapadyate

abhāne sthūladehasya svapne yadbhānamātmanaḥ /
so'nvayo vyatirekastadbhāne'nyānavabhāsanam

liṅgābhāne suṣuptau syādātmano bhānamanvayaḥ /
vyatirekastu tadbhāne liṅgasyābhānamucyate

tadvivekādviviktāḥ syuḥ koṣāḥ prāṇamanodhiyaḥ /
te hi tatra guṇāvasthābhedamātrātpṛthakkṛtāḥ

suṣuptyabhāne bhānantu samādhāvātmano'nvayaḥ /
vyatirekastvātmabhāne suṣuptyanavabhāsanam

yathāmuñjādiṣīkaivamātmā yuktyā samuddhṛtaḥ /
śarīratritayāddhīraiḥ paraṃ brahmaiva jāyate

parāparātmanorevaṃ yuktyā sambhāvitaikatā /
tattvamasyādivākyaiḥ sā bhāgatyāgena lakṣyate

jagato yadupādānaṃ māyāmādāya tāmasīm /
nimittaṃ śuddhasattvāṃ tāmucyate brahma tadgirā

yadā malinasattvāṃ tāṃ kāmakarmādidūṣitam /
ādatte tatparaṃ brahma tvaṃ padena tadocyate

tritayīmapi tāṃ muktvā parasparavirodhinīm /
akhaṇḍaṃ saccidānandaṃ mahāvākyena lakṣyate

so'yamityādivākyeṣu virodhāttadidantvayoḥ /
tyāgena bhāgayoreka āśrayo lakṣyate yathā

māyāvidye vihāyaivamupādhī parajīvayoḥ /
akhaṇḍaṃ saccidānandaṃ paraṃ brahmaiva lakṣyate

savikalpasya lakṣyatve lakṣyasya syādavastutā /
nirvikalpasya lakṣyatvaṃ na dṛṣṭaṃ na ca sambhavi

vikalpo nirvikalpasya savikalpasya vā bhavet /
ādye vyāhatiranyatrānavasthātmāśrayādayaḥ

idaṃ guṇakriyājātidravyasambandhavastuṣu /
samantena svarūpasya sarvametaditīṣyatām

vikalpatadabhāvābhyāmasaṃspṛṣṭātmavastuni /
vikalpitatvalakṣyatvasambandhādyāstu kalpitāḥ

itthaṃ vākyaistadarthānusandhānaṃ śravaṇaṃ bhavet /
yuktyā sambhāvitatvānusandhānaṃ mananantu tat

tābhyāṃ nirvicikitse'rthe cetasaḥsthāpitasya yat /
ekatānatvametaddhi nididhyāsanamucyate

dhyātṛdhyāne parityajya kramāddhyeyaikagocaram /
nirvātadīpavaccittaṃ samādhirabhidhīyate

vṛttayastu tadānīmajñātā apyātmagocarāḥ /
smaraṇādanumīyante vyutthitasya samutthitāt

vṛttīnāmanuvṛttistu prayatnātprathamādapi /
adṛṣṭāsakṛdabhyāsasaṃskāraḥ sacirādbhavet

yathā dīpo nivātastha ityādibhiranekadhā /
bhagavānimamevārthamarjunāya nyarūpayat

anādāviha saṃsāre sañcitāḥ karmakoṭayaḥ /
anena vilayaṃ yānti śuddho dharmo vivardhate

dharmameghamimaṃ prāhuḥ samādhiṃ yogavittamāḥ /
varṣatyeṣa yato dharmāmṛtadhārāḥ sahasraśaḥ

amunā vāsanājāle niḥśeṣaṃ pravilāpite /
samūlonmūlite puṇyapāpākhye karma sañcaye

vākyamapratibaddhaṃ satprākparokṣāvabhāsite /
karāmalakavadbodhamaparokṣaṃ prasūyate

parokṣaṃ brahmavijñānaṃ śābdaṃ deśikapūrvakam /
buddhipūrvakṛtaṃ pāpaṃ kṛtsnaṃ dahati vahnivat

aparokṣātmavijñānaṃ śābdaṃ deśikapūrvakam /
saṃsārakāraṇājñānatamasaścaṇḍabhāskaraḥ

itthaṃ tattvavivekaṃ vidhāya vidhivanmanaḥ samādhāya /
vigalitasaṃsṛtibandhaḥ prāpnoti pāraṃ padaṃ naro na hirāt

iti tattvavivekaḥ samāptaḥ

iti prathamo'dhyāya: