Paippalāda-Saṃhitā · Chapter 7.3
tigmebhir agne arcibhiḥ
śukreṇa deva śociṣā |
āmādo ni vaha tvam
anyam āsani kṛṇvatām ||
śociṣāgne arciṣā ca
nir daheto aghāyataḥ |
sakhyam āvaṃ kṛṇvahe tvaṃ ca-
-āmāda upa śaṃ bhuvan ||
nir āmādo nayāmasi
niṣ kravyādo gṛhebhyaḥ |
sasyādo nāma ye deva
te agne mā dabhan tvām ||
āmādaś ca kravyādaś ca
sasyādaś cobhayān saha |
prajāṃ ye cakrire bhāgaṃ
tān ito nir ṇayāmasi ||
ya āmeṣv aramanta
na pakvam upadādhṛṣuḥ |
te yantu sarve saṃbhūya-
-anyatreto 'ghāyavaḥ ||
ya enasvī duṣkṛtakṛt
kilbiṣakṛtasādhī yaḥ |
punas tān yajñiyā devā
nayantu yata āgatāḥ ||
ava reṇum ava rajo
nenije hastyaṃ malam |
dhātā no bhadrayā neṣat
sa no gopāyatu prajām ||
kṛṇve 'haṃ rodasī varma
syāma savituḥ save |
mātā no bhadrayā bhūmir
dyauś cāsmān pātv aṃhasaḥ ||
yad asurāṇām ahany
asmān pāpā upethana |
devānāṃ payaś ca daivyam
āpaḥ śundhantu mām imāḥ ||
ā te pitar marutāṃ sumnam emi
mā naḥ sūryasya saṃdṛśo yuvathāḥ |
abhi no vīro 'rvatīḥ kṣameta
pra jāyāmahai rudra prajayā ||
yo 'vṛddhaṃ hanti yo garbhe antar
yo jātaṃ janitavyaṃ ca pūruṣam |
tasmā ṛdhyāsaṃ haviṣāham adya
sa naḥ prajāṃ jaradaṣṭiṃ kṛṇotu ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0