Paippalāda-Saṃhitā · Chapter 7.18

vaikaṅkatenedhmena
devebhya ājyaṃ vaha |
agne tān iha mādaya
sarva ā yantu me havam ||

indra ā yāhi me havam
idaṃ kariṣyāmi tac chṛṇu |
ima aindrā atisarā
ākūtīḥ saṃ namantu me |
tebhiḥ śakema vīryaṃ
jātavedas tanūvaśin ||

yad asāv amuto devā
adevaḥ saṃścikīrṣati |
mā tasyāgnir havyaṃ vākṣīd
dhavaṃ devāś ca mopa gur
mamaiva havam etana ||

ati dhāvatātisarā
viśvasyeśānā ojasaḥ |
vṛścatāmuṣya jīvitam
indreṇa saha medinā ||

atisṛtyātisarā
indrasyaujasā hata |
aviṃ vṛka iva mathnīta
tato vo jīvan mā moci
prāṇam asyāpi nahyata ||

yān asau pratisarān akaś
cakāra kṛṇavac ca yān |
tvaṃ tān indra vṛtrahan
pratīcaḥ punar ā kṛdhi
yathāmuṃ tṛṇahañ janam ||

yam amī purodadhire
brahmāṇam upabhūtaye |
indrasya te adhaspadaṃ
taṃ pra yacchāmi mṛtyave
kravyād enaṃ śamayatu ||

yadi preyur devapurā
brahma varmāṇi cakrire |
tanūpānaṃ paripāṇāni cakrire
sarvaṃ tad arasaṃ kṛdhi ||

atrainam indra vṛtrahann
ugro marmaṇi vidhya |
atraivainam abhi tiṣṭha
śakra medy ahaṃ tava |
anu tvendrā rabhāmahe
syāma sumatau tava ||

yathendra udvācanaṃ
labdhvā cakre adhaspadam |
kṛṇve 'mum adharaṃ tathā
śaśvatībhyaḥ samābhyaḥ ||