Paippalāda-Saṃhitā · Chapter 6.20

ā rātri pārthivaṃ rajaḥ
pitur aprāyi dhāmabhiḥ |
divaḥ sadāṃsi bṛhatī vi tiṣṭhasa
ā tveṣaṃ vartate tamaḥ ||

na yasyāḥ pāraṃ dadṛśe na yoyuvad
viśvam asyāṃ ni viśate yad ejati |
ariṣṭāsas ta urvi tamasvati
rātri pāram aśīmahi
bhadre pāram aśīmahi ||

ye te rātri nṛcakṣaso
draṣṭāro navatir nava |
aśītiḥ santy aṣṭā
uto te sapta saptatiḥ ||

ṣaṣṭiś ca ṣaṭ ca revati
pañcāśat pañca sumnayi |
catvāraś catvāriṃśac ca
trayas triṃśac ca vājini ||

dvā ca viṃśatiś ca te
rātry ekādaśāvamāḥ |
tebhir no 'dya pāyubhir
ni pāhi duhitar divaḥ ||

rakṣā mākir ṇo aghaśaṃsa īśata
mā no duḥśaṃsa īśata ||

mā no adya gavāṃ steno
māvīnāṃ vṛka īśata |
māśvānāṃ bhadre taskaro
mā nṛṇāṃ yātudhānyaḥ ||

paramebhiḥ pathibhi
steno dhāvatu taskaraḥ |
pareṇa datvatī rajjuḥ
pareṇāghāyur arṣatu ||

andhaṃ rātri tiṣṭhadhūmam
aśīrṣāṇam ahiṃ kṛṇu |
hanū vṛkasya jambhaya-
-ā stenaṃ drupade jahi ||

tvayi rātri vasāmasi
svapiṣyāmasi jāgṛhi |
gobhyo naḥ śarma yaccha-
-aśvebhyaḥ puruṣebhyaḥ ||