Scripture Library

Paippalāda-Saṃhitā · Chapter 6.1

6.1.1

tad id āsa bhuvaneṣu jyeṣṭhaṃ
yato jajña ugras tveṣanṛmṇaḥ |
sadyo jajñāno ni riṇāti śatrūn
anu yaṃ viśve madanty ūmāḥ ||

6.1.2

vāvṛdhānaḥ śavasā bhūryojāḥ
śatrur dāsāya bhiyasaṃ dadhāti |
avyanac ca vyanac ca sasni
saṃ te navanta prabhṛtā madeṣu ||

6.1.3

tve kratum api pṛñcanti viśve
dvir yad ete trir bhavanty ūmāḥ |
svādoḥ svādīyaḥ svādunā sṛjā sam
adaḥ su madhu madhunābhi yodhīḥ ||

6.1.4

iti cid dhi tvā dhanā jayantaṃ
raṇeraṇe anumadanti viprāḥ |
ojīyo dhṛṣṇo sthiram ā tanuṣva
mā tvā dabhan durevā yātudhānāḥ ||

6.1.5

tvayā vayaṃ śāśadmahe raṇeṣu
prapaśyanto yudhenyāni bhūri |
codayāmi ta āyudhā vacobhiḥ
saṃ te śyāmi brahmaṇā vayāṃsi ||

6.1.6

stuṣeyyaṃ puruvarpasam ṛbhvam
inatamam āptyam āptyānām |
ā darśate śavasā sapta dānūn
pra sākṣate pratimānāni bhūri ||

6.1.7

ni tad dadhiṣe 'varaṃ paraṃ ca
yasminn āvithāvasā duroṇe |
ā mātarā sthāpayase jigatnū
ata inoṣi karvarā purūṇi ||

6.1.8

imā brahma bṛhaddivo vivakti-
-indrāya śūṣam agriyaḥ svarṣāḥ |
maho gotrasya kṣayati svarājo
duraś ca viśvā avṛṇod apa svāḥ ||

6.1.9

evā mahān bṛhaddivo atharvā-
-avocat svāṃ tanvam indram eva |
svasāro mātaribhvarīr ariprā
hinvanti ca śavasā vardhayanti ca ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0