પૈપ્પલાદ-સંહિતા · અધ્યાય 6.1

તદ્ ઇદ્ આસ ભુવનેષુ જ્યેષ્ઠં
યતો જજ્ઞ ઉગ્રસ્ ત્વેષનૃમ્ણઃ ।
સદ્યો જજ્ઞાનો નિ રિણાતિ શત્રૂન્
અનુ યં વિશ્વે મદન્ત્ય્ ઊમાઃ ॥

વાવૃધાનઃ શવસા ભૂર્યોજાઃ
શત્રુર્ દાસાય ભિયસં દધાતિ ।
અવ્યનચ્ ચ વ્યનચ્ ચ સસ્નિ
સં તે નવન્ત પ્રભૃતા મદેષુ ॥

ત્વે ક્રતુમ્ અપિ પૃઞ્ચન્તિ વિશ્વે
દ્વિર્ યદ્ એતે ત્રિર્ ભવન્ત્ય્ ઊમાઃ ।
સ્વાદોઃ સ્વાદીયઃ સ્વાદુના સૃજા સમ્
અદઃ સુ મધુ મધુનાભિ યોધીઃ ॥

ઇતિ ચિદ્ ધિ ત્વા ધના જયન્તં
રણેરણે અનુમદન્તિ વિપ્રાઃ ।
ઓજીયો ધૃષ્ણો સ્થિરમ્ આ તનુષ્વ
મા ત્વા દભન્ દુરેવા યાતુધાનાઃ ॥

ત્વયા વયં શાશદ્મહે રણેષુ
પ્રપશ્યન્તો યુધેન્યાનિ ભૂરિ ।
ચોદયામિ ત આયુધા વચોભિઃ
સં તે શ્યામિ બ્રહ્મણા વયાંસિ ॥

સ્તુષેય્યં પુરુવર્પસમ્ ઋભ્વમ્
ઇનતમમ્ આપ્ત્યમ્ આપ્ત્યાનામ્ ।
આ દર્શતે શવસા સપ્ત દાનૂન્
પ્ર સાક્ષતે પ્રતિમાનાનિ ભૂરિ ॥

નિ તદ્ દધિષે ઽવરં પરં ચ
યસ્મિન્ન્ આવિથાવસા દુરોણે ।
આ માતરા સ્થાપયસે જિગત્નૂ
અત ઇનોષિ કર્વરા પુરૂણિ ॥

ઇમા બ્રહ્મ બૃહદ્દિવો વિવક્તિ-
-ઇન્દ્રાય શૂષમ્ અગ્રિયઃ સ્વર્ષાઃ ।
મહો ગોત્રસ્ય ક્ષયતિ સ્વરાજો
દુરશ્ ચ વિશ્વા અવૃણોદ્ અપ સ્વાઃ ॥

એવા મહાન્ બૃહદ્દિવો અથર્વા-
-અવોચત્ સ્વાં તન્વમ્ ઇન્દ્રમ્ એવ ।
સ્વસારો માતરિભ્વરીર્ અરિપ્રા
હિન્વન્તિ ચ શવસા વર્ધયન્તિ ચ ॥