Paippalāda-Saṃhitā · Chapter 5.7

samutpatantu pradiśo nabhasvatīḥ
sam abhrāṇi vātajūtāni yantu |
maharṣabhasya nadato nabhasvato
vāśrā āpaḥ pṛthivīṃ tarpayantu ||

sam īkṣayati viṣvagvāto nabhāṃsy
apāṃ vegāsaḥ pṛthag ut patantu |
varṣasya sargā mahayantu bhūmiṃ
pṛthag jāyantām oṣadhayo viśvarūpāḥ ||

abhi kranda stanayārdayodadhiṃ
bhūmiṃ parjanya payasā sam aṅdhi |
tvayā varṣaṃ bahulam etu sṛṣṭam
āśāraiṣī kṛśagur etv astam ||

ud īrayata marutaḥ samudratas
tveṣā arkā nabha ut pātayantu |
pra varṣayanti taviṣāḥ sudānavo
'pāṃ rasair oṣadhayaḥ sacantām ||

gaṇās tvopa gāyantu mārutāḥ
parjanya ghoṣiṇaḥ pṛthak |
sargā varṣasya varṣataḥ
sṛjantu pṛthivīm abhi ||

sam avantu sudānava
utsā ajagarā uta |
vātā varṣasya varṣataḥ
pra vāntu pṛthivīm anu ||

vāto vidyud abhraṃ varṣaṃ
sam avantu sudānavaḥ |
pra pyāyasva pra pinvasva
saṃ bhūmiṃ payasā sṛja ||

apām agnis tanūbhiḥ saṃvidāno
ya oṣadhīnām adhipā babhūva |
sa no varṣaṃ vanutāṃ jātavedāḥ
prāṇaṃ prajābhyo amṛtaṃ divas pari ||

āśām-āśāṃ vi dyotatāṃ
vātā vāntu diśo-diśaḥ |
marudbhiḥ pracyutā meghā
varṣantu pṛthivīm abhi ||

prajāpatiḥ salilād ā samudrād
āpa īrayann udadhim ardayāti |
pra pyāyatāṃ vṛṣṇo aśvasya reto
'rvāṅ etena stanayitnunehy
apo niṣiñcann asuraḥ pitā naḥ ||

śvasantu gargarā apām
ava nīcīr apaḥ sṛja |
vadantu pṛśnibāhavo
maṇḍūkā īriṇānu ||

saṃvatsaraṃ śaśayānā
brāhmaṇā vratacāriṇaḥ |
vācaṃ parjanyajinvatāṃ
pra maṇḍūkā avādiṣuḥ ||

upapravada maṇḍūki
varṣam ā vada tāduri |
madhye hradasya plavasva
vigṛhya caturaḥ padaḥ ||

mahāntaṃ kośam ud acābhi ṣiñca
savidyutaṃ bhavatu vātu vātaḥ |
tanvatāṃ yajñaṃ bahudhā visṛṣṭam
ānandinīr oṣadhayo bhavantu ||