Paippalāda-Saṃhitā · Chapter 5.4

mamāgne varco vihaveṣv astu
vayaṃ tvendhānās tanvaṃ puṣema |
mahyaṃ namantāṃ pradiśaś catasras
tvayādhyakṣeṇa pṛtanā jayema ||

agne manyuṃ pratinudan pareṣāṃ
tvaṃ no gopāḥ pari pāhi viśvataḥ |
apāñco yantu prabudhā durasyavo
'maiṣāṃ cittaṃ bahudhā vi naśyatu ||

mama devā vihave santu sarva
indravanto maruto viṣṇur agniḥ |
mamāntarikṣam urulokam astu
mahyaṃ vātaḥ pavatāṃ kāme asmin ||

mahyaṃ yajantāṃ mama yānīṣṭā-
-ākūtiḥ satyā manaso me astu |
eno mā ni gāṃ katamac canāhaṃ
viśve devā abhi rakṣantu mām iha ||

mahyaṃ devā draviṇam ā yajantāṃ
mamāśīr astu mama devahūtiḥ |
daivā hotāraḥ saniṣan na etad
ariṣṭāḥ syāma tanvā suvīrāḥ ||

devīḥ ṣaḍ urvīr uru ṇas karātha
viśve devāsa iha mādayadhvam |
mā hāsmahi prajayā mā dhanena
mā radhāma dviṣate soma rājan ||

uruvyacā no mahiṣaḥ śarma yacchād
asmin vāje puruhūtaḥ purukṣuḥ |
sa naḥ prajāyai haryaśva mṛḍa-
-indra mā no rīriṣo mā parā dāḥ ||

dhātā vidhartā bhuvanasya yas patiḥ
savitā devo abhimātiṣāhaḥ |
bṛhaspatir indrāgnī aśvinobhā
devāḥ pāntu yajamānaṃ nirṛthāt ||

ihārvāñcam ati hvaya
indraṃ jaitrāya jetave |
asmākam astu kevala
itaḥ kṛṇotu vīryam ||

arvāñcam indram amuto havāmahe
yo gojid dhanajid aśvajid yaḥ |
imaṃ no yajñaṃ vihave juṣasva-
-asmākaṃ kṛṇmo harivo medinaṃ tvā ||

trātāram indram avitāram indraṃ
havehave suhavaṃ śūram indram |
huvema śakraṃ puruhūtam indraṃ
svasti no maghavān pātv indraḥ ||

tisro devīr mahi me śarma yacchan
prajāyai me tanve yac ca puṣṭam |
māṃ viśaḥ saṃmanaso juṣantāṃ
pitryaṃ kṣetraṃ prati jānātv asmān ||

yo naḥ śakrābhimanyunā-
-indrāmitro jighāṃsati |
tvaṃ taṃ vṛtrahañ jahi
vasv asmabhyam ā bhara ||

ye naḥ śapanty apa te bhavantv
indrāgnibhyām apa bādhāmahe tān |
ādityā rudrā uparispṛśo mām
ugraṃ cettāram adhirājam akran ||