પૈપ્પલાદ-સંહિતા · અધ્યાય 5.4

મમાગ્ને વર્ચો વિહવેષ્વ્ અસ્તુ
વયં ત્વેન્ધાનાસ્ તન્વં પુષેમ ।
મહ્યં નમન્તાં પ્રદિશશ્ ચતસ્રસ્
ત્વયાધ્યક્ષેણ પૃતના જયેમ ॥

અગ્ને મન્યું પ્રતિનુદન્ પરેષાં
ત્વં નો ગોપાઃ પરિ પાહિ વિશ્વતઃ ।
અપાઞ્ચો યન્તુ પ્રબુધા દુરસ્યવો
ઽમૈષાં ચિત્તં બહુધા વિ નશ્યતુ ॥

મમ દેવા વિહવે સન્તુ સર્વ
ઇન્દ્રવન્તો મરુતો વિષ્ણુર્ અગ્નિઃ ।
મમાન્તરિક્ષમ્ ઉરુલોકમ્ અસ્તુ
મહ્યં વાતઃ પવતાં કામે અસ્મિન્ ॥

મહ્યં યજન્તાં મમ યાનીષ્ટા-
-આકૂતિઃ સત્યા મનસો મે અસ્તુ ।
એનો મા નિ ગાં કતમચ્ ચનાહં
વિશ્વે દેવા અભિ રક્ષન્તુ મામ્ ઇહ ॥

મહ્યં દેવા દ્રવિણમ્ આ યજન્તાં
મમાશીર્ અસ્તુ મમ દેવહૂતિઃ ।
દૈવા હોતારઃ સનિષન્ ન એતદ્
અરિષ્ટાઃ સ્યામ તન્વા સુવીરાઃ ॥

દેવીઃ ષડ્ ઉર્વીર્ ઉરુ ણસ્ કરાથ
વિશ્વે દેવાસ ઇહ માદયધ્વમ્ ।
મા હાસ્મહિ પ્રજયા મા ધનેન
મા રધામ દ્વિષતે સોમ રાજન્ ॥

ઉરુવ્યચા નો મહિષઃ શર્મ યચ્છાદ્
અસ્મિન્ વાજે પુરુહૂતઃ પુરુક્ષુઃ ।
સ નઃ પ્રજાયૈ હર્યશ્વ મૃડ-
-ઇન્દ્ર મા નો રીરિષો મા પરા દાઃ ॥

ધાતા વિધર્તા ભુવનસ્ય યસ્ પતિઃ
સવિતા દેવો અભિમાતિષાહઃ ।
બૃહસ્પતિર્ ઇન્દ્રાગ્ની અશ્વિનોભા
દેવાઃ પાન્તુ યજમાનં નિરૃથાત્ ॥

ઇહાર્વાઞ્ચમ્ અતિ હ્વય
ઇન્દ્રં જૈત્રાય જેતવે ।
અસ્માકમ્ અસ્તુ કેવલ
ઇતઃ કૃણોતુ વીર્યમ્ ॥

અર્વાઞ્ચમ્ ઇન્દ્રમ્ અમુતો હવામહે
યો ગોજિદ્ ધનજિદ્ અશ્વજિદ્ યઃ ।
ઇમં નો યજ્ઞં વિહવે જુષસ્વ-
-અસ્માકં કૃણ્મો હરિવો મેદિનં ત્વા ॥

ત્રાતારમ્ ઇન્દ્રમ્ અવિતારમ્ ઇન્દ્રં
હવેહવે સુહવં શૂરમ્ ઇન્દ્રમ્ ।
હુવેમ શક્રં પુરુહૂતમ્ ઇન્દ્રં
સ્વસ્તિ નો મઘવાન્ પાત્વ્ ઇન્દ્રઃ ॥

તિસ્રો દેવીર્ મહિ મે શર્મ યચ્છન્
પ્રજાયૈ મે તન્વે યચ્ ચ પુષ્ટમ્ ।
માં વિશઃ સંમનસો જુષન્તાં
પિત્ર્યં ક્ષેત્રં પ્રતિ જાનાત્વ્ અસ્માન્ ॥

યો નઃ શક્રાભિમન્યુના-
-ઇન્દ્રામિત્રો જિઘાંસતિ ।
ત્વં તં વૃત્રહઞ્ જહિ
વસ્વ્ અસ્મભ્યમ્ આ ભર ॥

યે નઃ શપન્ત્ય્ અપ તે ભવન્ત્વ્
ઇન્દ્રાગ્નિભ્યામ્ અપ બાધામહે તાન્ ।
આદિત્યા રુદ્રા ઉપરિસ્પૃશો મામ્
ઉગ્રં ચેત્તારમ્ અધિરાજમ્ અક્રન્ ॥