Scripture Library

Paippalāda-Saṃhitā · Chapter 5.38

5.38.1

keśy agniṃ keśī viṣaṃ
keśī bibharti rodasī |
keśī viśvaṃ svar dṛśe
keśīdaṃ jyotir ucyate ||

5.38.2

munayo vātaraśanāḥ
piśaṅgā vasate malāḥ |
vātasyānu dhrājiṃ yanti
yad devāso ayukṣata ||

5.38.3

unmaditā mauneyena
vātām̐ ā tasthimā vayam |
śarīred asmākaṃ yūyaṃ
martāso abhi paśyatha ||

5.38.4

antarikṣeṇa patati
svar bhūtāvacākaśat |
munir devasya-devasya
saukṛtyāya sakhā hitaḥ ||

5.38.5

indrasyāśvo vāyoḥ sakhā-
-atho deveṣito muniḥ |
ubhā samudrāv ā kṣayati
sadyaḥ pūrvam utāparam ||

5.38.6

gandharvāṇām apsarasāṃ
devānāṃ caraṇe caran |
muniḥ ketasya saṃvidvān
sakhā svādur madintamaḥ ||

5.38.7

vāyur asmā upāmanthat
pinaṣṭi smā kunaṃnamā |
munir viṣasya pātreṇa
yad rudreṇāpibat saha ||

5.38.8

saṃyukte dyāvāpṛthivī
tiṣṭhantī avicartye |
keśenaikasya devasya
vy aṣṭabhnāc chacīpatiḥ ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0