Paippalāda-Saṃhitā · Chapter 5.28

pramucyamānaṃ bhuvanasya gopaḥ
paśuṃ no atra prati bhāgam etu |
agnir yajñaṃ trivṛtaṃ saptatantuṃ
devo devebhyo havyaṃ vahatu prajānan ||

yau te daṃṣṭrau sudihau ropayiṣṇū
nir hvayete dakṣiṇāḥ saṃ ca paśyataḥ |
anāṣṭraṃ naḥ pitaras tat kṛṇotu
yūpe baddhaṃ pramumucimā yad annam ||

ahrastas tvam aviduṣṭaḥ parehi-
-indrasya goṣṭham api dhāva vidvān |
dhīrāsas tvā kavayaḥ saṃ mṛjantv
iṣam ūrjaṃ yajamānāya matsva ||

ṛṣibhiṣ ṭvā saptabhir atriṇāhaṃ
prati gṛhṇāmi bhuvane syonam |
jamadagniḥ kaśyapaḥ svādv etad
bharadvājo madhv annaṃ kṛṇotu |
pratigrahītre gotamo vasiṣṭho
viśvāmitro daduṣe śarma yacchāt ||

yan no agraṃ haviṣa ājagāma-
-annasya pātram uta sarpiṣo vā |
yad vā dhanaṃ vahator ājagāma-
-agniṣ ṭad dhotā suhutaṃ kṛṇotu ||

yad ājyaṃ pratijagrabha yāṃś ca vrīhīn
ajaṃ candreṇa saha yaj jaghāsa |
bṛhaspatir haviṣo no vidhartā
mā no hiṃsīc chāgo aśvo vaśā ca ||

agnir na etat prati gṛhṇātu vidvān
bṛhaspatiḥ praty etu prajānan |
indro marutvān suhutaṃ kṛṇotv
ayakṣmam anamīvaṃ te astu ||

yan no dadur varāham akṣitaṃ vasu
yad vā talpam upadhānena naḥ saha |
yad vāviyūthaṃ saha vṛṣṇyā no
agniṣ ṭad dhotā suhutaṃ kṛṇotu ||

yan naḥ śālāṃ viśvabhogām imāṃ dadur
gṛhaṃ vā yoktraṃ saha kṛttyota |
yad vā hara upanāhena devā
agniṣ ṭad dhotā suhutaṃ kṛṇotu ||