Scripture Library

Paippalāda-Saṃhitā · Chapter 5.12

5.12.1

vṛṣā jajñe madhavāno
'yaṃ madhumatībhyaḥ |
sa u te yonim ā śayāṃ
baḍ dakṣaḥ puruṣo bhavan ||

5.12.2

yoniṃ gaccha madhavāna
yonyāṃ puruṣo bhava |
tataḥ punar nir āyasi
śīrṣṇā śroṇī vinonudat ||

5.12.3

bāṇavām̐ iṣudher iva
kṛṇvan pitror yathā priyam |
śroṇī ahiṃsann antarā
daśame māsy āyasi ||

5.12.4

sa pratyaṅ pratyāvarttā -
- ite saṃvatsare punaḥ |
yathā jīvāsi bhadrayā
bibharat tvā mahābhave ||

5.12.5

saṃ te yonim acīkl̥paṃ
suprajāstvāya bhadrayā |
tatrā siñcasva vṛṣṇyaṃ
daśamāsyam avihrutam ||

5.12.6

garbhas te yonim ā śayāṃ
garbho jarāyv ā śayām |
kumāra ulbam ā śayāṃ
tvaṣṭrā kl̥pto yathāparu ||

5.12.7

yathā rājan madhavāna
tvaṃ bījaṃ virohasi |
evā tvam asyā nir bhindhi
kumāraṃ yonyā adhi ||

5.12.8

garbham adhān madhavāno
garbhaṃ devo bṛhaspatiḥ |
garbhaṃ ta indraś cāgniś ca
garbhaṃ dhātā dadhātu te ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0