Scripture Library

Paippalāda-Saṃhitā · Chapter 5.11

5.11.1

anu te manyatām agnir
varuṇas te 'nu manyatām |
tatas te putro jāyatāṃ
sa varmī goṣu yudhyatām ||

5.11.2

idaṃ vāyo 'nu jānīhi-
-idam indra bṛhaspate |
āñjanaṃ putravedanaṃ
kṛṇmaḥ puṃsavanaṃ vayam ||

5.11.3

yenaitat pariṣṭabhitaṃ
yasmāt putraṃ na vindase |
indrāgnī tasmāt tvainasaḥ
pari pātām ahardivi ||

5.11.4

atharvāṇo aṅgiraso
viśve devā ṛtāvṛdhaḥ |
śṛṇvantv adya me havam
asyai putrāya vettave ||

5.11.5

indrāṇī varuṇānī
sinīvāly utāditiḥ |
varutry ugrā patnīnāṃ
putram adya dideṣṭu te ||

5.11.6

putraṃ te mitrāvaruṇā
putraṃ devī sarasvatī |
putraṃ te aśvinobhā-
-ā dhattāṃ puṣkarasrajā ||

5.11.7

yeṣāṃ ca nāma jagrabha
yeṣāṃ ca nopasasmara |
devās te sarve saṃgatya
putraṃ jaivātṛkaṃ dadan ||

5.11.8

ātmana enaṃ nir mimīṣva
sa tvat pari jāyatām |
tvaṃ bījam urvareva
tvaṃ bibhṛhi yonyām ||

5.11.9

pṛthivī saha yajñair
nakṣatraiḥ saha sūryaḥ |
vātaḥ patatribhiḥ saha
putram adya dideṣṭu te ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0