Scripture Library

Paippalāda-Saṃhitā · Chapter 4.6

4.6.1

hiraṇyaśṛṅgo vṛṣabho
yaḥ samudrād udācarat |
tenā sahasyenā vayaṃ
ni janānt svāpayāmasi ||

4.6.2

na bhūmiṃ vāto 'ti vāti
nāti tapati sūryaḥ |
janāṃś ca sarvān svāpaya
śunaś cendrasakhā caran ||

4.6.3

vahyeśayāḥ proṣṭheśayā
nārīr yās talpaśīvarīḥ |
striyo yāḥ puṇyagandhās
tāḥ sarvāḥ svāpayāmasi ||

4.6.4

ejadejad ajagrabhaṃ
cakṣuḥ prāṇam ajagrabham |
aṅgāny agrabhaṃ sarvā
rātrīṇām atiśarvare ||

4.6.5

ya āste yaś ca carati
yaś ca tiṣṭhan vipaśyati |
teṣāṃ saṃ dadhmo akṣāṇi
yathedaṃ harmyaṃ tathā ||

4.6.6

svaptu mātā svaptu pitā
svaptu śvā svaptu viśpatiḥ |
svapantu sarve jñātayaḥ
sarvaṃ ni ṣvāpayā janam ||

4.6.7

svapna svapnābhikaraṇena
sarvaṃ ni ṣvāpayā janam |
otsūryam anyān svāpaya-
-āvyuṣaṃ caratād aham
indra ivāriṣṭo akṣitaḥ ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0