પૈપ્પલાદ-સંહિતા · અધ્યાય 4.6

હિરણ્યશૃઙ્ગો વૃષભો
યઃ સમુદ્રાદ્ ઉદાચરત્ ।
તેના સહસ્યેના વયં
નિ જનાન્ત્ સ્વાપયામસિ ॥

ન ભૂમિં વાતો ઽતિ વાતિ
નાતિ તપતિ સૂર્યઃ ।
જનાંશ્ ચ સર્વાન્ સ્વાપય
શુનશ્ ચેન્દ્રસખા ચરન્ ॥

વહ્યેશયાઃ પ્રોષ્ઠેશયા
નારીર્ યાસ્ તલ્પશીવરીઃ ।
સ્ત્રિયો યાઃ પુણ્યગન્ધાસ્
તાઃ સર્વાઃ સ્વાપયામસિ ॥

એજદેજદ્ અજગ્રભં
ચક્ષુઃ પ્રાણમ્ અજગ્રભમ્ ।
અઙ્ગાન્ય્ અગ્રભં સર્વા
રાત્રીણામ્ અતિશર્વરે ॥

ય આસ્તે યશ્ ચ ચરતિ
યશ્ ચ તિષ્ઠન્ વિપશ્યતિ ।
તેષાં સં દધ્મો અક્ષાણિ
યથેદં હર્મ્યં તથા ॥

સ્વપ્તુ માતા સ્વપ્તુ પિતા
સ્વપ્તુ શ્વા સ્વપ્તુ વિશ્પતિઃ ।
સ્વપન્તુ સર્વે જ્ઞાતયઃ
સર્વં નિ ષ્વાપયા જનમ્ ॥

સ્વપ્ન સ્વપ્નાભિકરણેન
સર્વં નિ ષ્વાપયા જનમ્ ।
ઓત્સૂર્યમ્ અન્યાન્ સ્વાપય-
-આવ્યુષં ચરતાદ્ અહમ્
ઇન્દ્ર ઇવારિષ્ટો અક્ષિતઃ ॥