પૈપ્પલાદ-સંહિતા · અધ્યાય 4.4

સ્તુવાનમ્ અગ્ન આ નય
યાતુધાનં કિમીદિનમ્ ।
ત્વં હિ દેવાન્તિતો
હન્તા દસ્યોર્ બભૂવિથ ॥

આજ્યસ્ય પરમેષ્ઠિઞ્
જાતવેદસ્ તનૂવશિન્ ।
અગ્ને તૌલસ્ય પ્રાશાન
યાતુધાનાન્ વિ લાપય ॥

વિ લપન્તુ યાતુધાના
અત્રિણો યે કિમીદિનઃ ।
અથેદમ્ અગ્ને નો હવિર્
ઇન્દ્રશ્ ચ પ્રતિ હર્યતમ્ ॥

અગ્નિઃ પુરસ્તાદ્ આ યચ્છતુ
પ્રેન્દ્રો નુદતુ બાહુમાન્ ।
બ્રવીતુ સર્વો યાતુમાન્
અયમ્ અસ્મીત્ય્ એત્ય ॥

પશ્યામિ તે વીર્યા જાતવેદઃ
પ્ર ણો બ્રૂહિ યાતુધાનાન્ નૃચક્ષઃ ।
ત્વયા સર્વે પરિતપ્તાઃ પુરસ્તાદ્
આ યન્તુ પ્રબ્રુવાણા ઉપેદમ્ ॥

આ રભસ્વ જાતવેદો
હૃદઃ કામાય રન્ધય ।
દૂતો નો અગ્ન ઉત્ તિષ્ઠ
યાતુધાનાન્ ઇહા નય ॥

ત્વમ્ અગ્ને યાતુધાનાન્
ઉપબદ્ધાન્ ઇહા નય ।
અથૈષામ્ ઇન્દ્રો વજ્રેણ-
-અપિ શીર્ષાણિ વૃશ્ચતુ ॥

ઇદં હવિર્ યાતુધાનાન્
નદી ફેનમ્ ઇવા વહાત્ ।
યદીદં સ્ત્રી પુમાન્ અકર્
ઇહ સ સ્તુવતાં જનઃ ॥

યાતુધાનસ્ય સોમપ
જહિ પ્રજાં નયસ્વ ચ ।
નિ ષ્ટુવાનસ્ય પાતય
પરમ્ અક્ષ્ય્ ઉતાવરમ્ ॥

અયં સ્તુવાન આગમત્
તં સ્મોત પ્રતિ હર્યત ।
બૃહસ્પતે વશે કૃથા
અગ્નીષોમા વિ વિધ્યતમ્ ॥