Scripture Library

Paippalāda-Saṃhitā · Chapter 3.29

3.29.1

pratīcī somam asy oṣadhe
pratīcy uta sūryam |
pratīcī viśvān devāṃs
tathā tvācchā vadāmasi ||

3.29.2

imāṃ khanāmy oṣadhiṃ
nitatnīm anutantamām |
āyataḥ pratinandanīṃ
parāyato nivartanīm ||

3.29.3

amuṣyāhaṃ parāyata
āyato mano agrabham |
agrabhaṃ hastyaṃ mano
'tho hṛdayyaṃ manaḥ ||

3.29.4

mayi te mana āhitaṃ
mayi cittaṃ mayi vratam |
mamed api kratāv aso
mama citte sacāvahai ||

3.29.5

ahaṃ vadāni mā tvaṃ
sabhāyāṃ gha tvaṃ vada |
mamed asas tvaṃ kevalo
nānyāsāṃ kīrtayāś cana ||

3.29.6

yadi vāsi tiro janaṃ
yadi vā nadyas tiraḥ |
iyaṃ tvā mahyam oṣadhir
baddhveva ny ānayāt ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0