Scripture Library

Paippalāda-Saṃhitā · Chapter 3.26

3.26.1

gṛhān aimi manasā modamāna
ūrjaṃ bibhrad vasumaniḥ sumedhāḥ |
aghoreṇa cakṣuṣā mitriyeṇa
gṛhāṇāṃ paśyan paya ut tarāmi ||

3.26.2

ime gṛhā mayobhuva
ūrjasvantaḥ payasvantaḥ |
pūrṇā vāmasya tiṣṭhantas
te no jānantu jānataḥ ||

3.26.3

sūnṛtāvantaḥ subhagā
irāvanto hasāmudāḥ |
akṣudhyā atṛṣyāso
gṛhā māsmad bibhītana ||

3.26.4

yeṣām adhyeti pravasan
yeṣu saumanaso bahuḥ |
gṛhān upa hvayāmahe
te no jānantv āyataḥ ||

3.26.5

upahūtā iva gāva
upahūtā ajāvayaḥ |
atho annasya kīlāla
upahūto gṛheṣu naḥ ||

3.26.6

upahūtā bhūridhanāḥ
sakhāyaḥ svādusaṃmudaḥ |
ariṣṭāḥ sarvapūruṣā
gṛhā naḥ santu sarvadā ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0