Paippalāda-Saṃhitā · Chapter 20.35

saṃ varcasety ekā ||

saṃsrāvabhāgās taviṣā bṛhantaḥ
prastareṣṭhā barhiṣadaś ca devāḥ |
imaṃ yajñam abhi viśve gṛṇantaḥ
svāhā devā amṛtā mādayantām ||

yān āvaha uśato deva devāṃs
tān preraya punar agne sve sadhasthe |
jakṣivāṃsaḥ papivāṃso madhūny
asmai dhatta vasavo vasūni ||

ayaṃ no yajño apy etu devān
uttarāṃ vedim apy etu vediḥ |
vi muñcāmy ṛtvijo dakṣiṇābhir
devā yakṣīṣṭa punar uttarāvat ||

yajña yajñaṃ gaccha
yajñapatiṃ gaccha |
svāṃ yoniṃ gaccha svāhā ||

eṣa te yajño yajamāna sahasūktanamovākaḥ |
suvīraḥ svāhā ||

manasaspata imaṃ deva yajñam |
svāhā vāci svāhā vāte dhāḥ svāhā ||

svāhā hutebhyo
vaṣaḍ ḍhutebhyaḥ |
devā gātuvido gātuṃ vittvā gātum ita svāhā ||

saṃ barhir aktaṃ haviṣā ghṛtena
sam indreṇa vasubhiḥ saṃ marudbhiḥ |
saṃ devebhir viśvadevebhir aktam
indraṃ gacchatu yat svāhā ||

āśāsānā saumanasaṃ
prajāṃ cakṣur atho balam |
indrāṇyā anuvrataṃ
saṃ nahye amṛtāya kam ||