Scripture Library

Paippalāda-Saṃhitā · Chapter 20.31

20.31.1

divi tārā udabhi śryan
sapta sūryasya raśmayaḥ |
dhārāḥ samudriyā apas
tās te śalyam acucyavuḥ ||

20.31.2

īḍe agniṃ svāvasuṃ namobhir
iha prasakto vi cayat kṛtaṃ naḥ |
rathair iva pra bhare vājayadbhiḥ
pradakṣiṇaṃ marutāṃ stomam ṛdhyām ||

20.31.3

sapta sravanti śiśave marutvate
pitā putrebhyo apy avīvatad v ṛtā |
ubhe pipṛta ubhe asya rājata
ubhe yatete ubhe asya puṣyataḥ ||

20.31.4

vedaḥ svastir druhaṇaḥ svastiḥ
parśur vediḥ paraśur naḥ svastiḥ |
haviṣkṛto yajñiyā yajñakāmās
te devāso havir idaṃ juṣadhvam ||

20.31.5

upa priyaṃ panipnataṃ
yuvānam āhutīvṛdham |
aganma bibhrato namaḥ ||

20.31.6

imā yās te śataṃ hirāḥ
sahasraṃ dhamanīr uta |
tāsāṃ te sarvāsāṃ sākam
aśmanā bilam apy adhām ||

20.31.7

idaṃ khanāmi bheṣajaṃ
māṃpaśyam abhirorudam |
yenā nicakra āsur-
-īndrāṇī kevalaṃ patim ||

20.31.8

akṣyau nau madhusaṃkāśe
anīkaṃ nau samañjanam |
antaḥ kṛṇuṣva mā hṛdi
mana in nau sahāsati ||

20.31.9

tvāṣṭreṇāhaṃ vacas-
-erṣyāṃ vy amīmadam |
atho yo manyus te pate
tam u te śamayāmasi ||

20.31.10

vratena tvaṃ vratapate samakto
'hā viśvā sumanā dīdhyo naḥ |
taṃ tvā vayaṃ jātavedaḥ samiddhaṃ
prajāvanta upa sadema sarve ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0