Paippalāda-Saṃhitā · Chapter 20.25

dūrād bheṣajam ābhṛtaṃ
bahūny ati yojanā |
apaśyam asyantaṃ rudraṃ
na dṛṣṭo duṣkṛtaṃ karat ||

bhinadmi te parāvato
vatsasya śepyām iva |
vṛṣed aso yathā mayi
kṛṣṇo viṣāṇavām̐ iva ||

sarvā gāvaḥ saṃmanasaḥ
sacchavayaḥ sanābhayaḥ |
samānaṃ bibhratīr nāma
vatsā ud rihatāṃ mithaḥ ||

indras tvāgre avānayat
savitā tvotāparaḥ |
tṛtīyam aśvinā tvāghnye vāñcha ||

ā te nayatu savit-
-ā nayatu bṛhaspatiḥ |
patir yaḥ pratikāmyas
tam asyai dhehy oṣadhe ||

indraṃ vayam anurādham ity ekā ||

bhaga prehi prathamo
'nu tvā vayam emasi |
indrāgnī brahmaṇāsmān
svasti nayatāṃ pathā ||

aditiḥ praitu prathamā
bṛhaspatiḥ puraetā te astu |
indro bhayaṃ vy asyatu
śūdrāc ca na āryāc ca ||

ime ye anasi yuktā
uṣṭārā uta pīlvā |
teṣāṃ sam agrabhaṃ padaḥ
sam īrmān sam u sakthyaḥ ||

vi madhyamā aproṣata
gardabhā kṣipitā iva |
athāsurasya māyayā
mayīdaṃ sthāpayāmasi ||