Paippalāda-Saṃhitā · Chapter 2.88
śāsa itthā mahām̐ asy
amitraghāto adbhutaḥ |
na yasya hanyate sakhā
na jīyate kadā cana ||
vi rakṣo vi mṛdho jahi
vi vṛtrasya hanū ruja |
vi manyum indra vṛtrahann
amitrasyābhidāsataḥ ||
vi na indra vi mṛdho jahi
nīcā yaccha pṛtanyataḥ |
adhamaṃ gamayā tamo
yo asmām̐ abhidāsati ||
svastidā viśāṃ patir
vṛtrahā vimṛdho vaśī |
vṛṣendraḥ pura etu naḥ
somapā abhayaṃkaraḥ ||
apendra dviṣato mano
'pa jijyāsato vadham |
vi mahac charma yaccha
varīyo yāvayā vadham ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0