Scripture Library

Paippalāda-Saṃhitā · Chapter 2.36

2.36.1

yā vaiśvadevīr iṣavo yā vasūnāṃ
yā rudrasya somasya yā bhagasya |
viśve devā iṣavo yāvatīr vas
tā vo agninā śarmaṇā śamayāmi ||

2.36.2

yā ādityānām iṣavo yā vasūnāṃ
yā rudrasyāśvinor yāvatīs tāḥ |
viśve devā iṣavo yāvatīr vas
tā vo devaḥ savitā śamayāti ||

2.36.3

yās te agna iṣavo vāta yās te
apām adityām uta yā marutsu |
indraś ca sāmnā varuṇaś ca rājā
tā vaḥ sūryo bṛhatā śamayāti ||

2.36.4

mā vṛkṣmahy ādityebhyo mā vasubhyo
mā rudrāyāgnaye pārthivāya |
indrasya śuco varuṇasya yāḥ śucas
tā vo devy aditiḥ śamayāti ||

2.36.5

yāś ca vāte viṣvagvāte
yāś ca rudrasya dhanvani |
agniṣ ṭā vasor īśānaḥ
sarvās tā bheṣajā karat ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0