પૈપ્પલાદ-સંહિતા · અધ્યાય 2.36
યા વૈશ્વદેવીર્ ઇષવો યા વસૂનાં
યા રુદ્રસ્ય સોમસ્ય યા ભગસ્ય ।
વિશ્વે દેવા ઇષવો યાવતીર્ વસ્
તા વો અગ્નિના શર્મણા શમયામિ ॥
યા આદિત્યાનામ્ ઇષવો યા વસૂનાં
યા રુદ્રસ્યાશ્વિનોર્ યાવતીસ્ તાઃ ।
વિશ્વે દેવા ઇષવો યાવતીર્ વસ્
તા વો દેવઃ સવિતા શમયાતિ ॥
યાસ્ તે અગ્ન ઇષવો વાત યાસ્ તે
અપામ્ અદિત્યામ્ ઉત યા મરુત્સુ ।
ઇન્દ્રશ્ ચ સામ્ના વરુણશ્ ચ રાજા
તા વઃ સૂર્યો બૃહતા શમયાતિ ॥
મા વૃક્ષ્મહ્ય્ આદિત્યેભ્યો મા વસુભ્યો
મા રુદ્રાયાગ્નયે પાર્થિવાય ।
ઇન્દ્રસ્ય શુચો વરુણસ્ય યાઃ શુચસ્
તા વો દેવ્ય્ અદિતિઃ શમયાતિ ॥
યાશ્ ચ વાતે વિષ્વગ્વાતે
યાશ્ ચ રુદ્રસ્ય ધન્વનિ ।
અગ્નિષ્ ટા વસોર્ ઈશાનઃ
સર્વાસ્ તા ભેષજા કરત્ ॥
મૂળ પાઠ: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0