Paippalāda-Saṃhitā · Chapter 19.51

idāvatsarāya parivatsarāya
saṃvatsarāya prati vedayāma etat |
yad vrateṣu duritaṃ nijagmima
durhārdaṃ tena śamalenāñjmaḥ ||

yan me vrataṃ vratapate lulobha -
-ahorātre sam adhātāṃ ma etat |
udyan purastād bhiṣag astu candramāḥ
sūryo raśmibhir abhi gṛṇātv etat ||

yad vratam atipede
cittyā manasā hṛdā |
ādityā rudrās tan mayi
vasavaś ca sam indhatām ||

vratāni vratapataya
upā karomy agnaye |
sa me dyumnaṃ bṛhad yaśo
dīrgham āyuṣ kṛṇotu me ||

mayobhūr vāto abhi vātūsrā
ūrjasvatīr oṣadhīr ā riśantām |
medasvatīr jīvadhanyā mayobhuvaḥ
padvate 'vasāya rudra mṛḍa ||

yā ekarūpā viśvarūpāḥ sarūpā
yāsām agnir ūdho vo janma veda |
yā aṅgirasas tapaseha cakrus
tābhyaḥ parjanya mahi śarma yacchāt ||

yā deveṣu tanva airayanta
yāsāṃ somo rūpadheyāni veda |
tā asmabhyaṃ bahulāḥ pinvamānāḥ
prajāvatīr indra goṣṭhe didiśyāḥ ||

prajāpatir mahyam etā rarāṇo
bahvīḥ satīr upa me goṣṭha ākaḥ |
tāsāṃ vayaṃ prajayā saṃ sadema
jyog jīvantaḥ śaradaḥ purūcīḥ ||

abhiṣṭhitā carkardīti
piśaṅgī bahukardinī |
kardo ha jajñe hālīkṣṇād
vrīher māṣād atho yavāt ||

yathā bhasad dhālīkṣṇasya
na saṃbhavati kardave |
evā halagna kardaya
nir grāmān nir diśo jahi ||

yathā parasvāṃ chardhate
gardabhaḥ kṛdhusandṛśaḥ |
evā te śardhatāṃ bhasad
dhālīkṣṇaparṇa śardhaya
vṛtrahā śākī śardhaya ||

pavīraval lāṅgalaṃ
suśevaṃ somapitsaram |
tad ut kṛṣati gām aviṃ
prapharvyaṃ ca pīvarīṃ
prastāvaṃ rathavāhanam ||

śunaṃ varatrām ā yaccha
śunam aṣṭrām ud iṅgaya |
śunaṃ vāhasya yuktasya-
-aṣṭrayā jahi dakṣiṇam ||

madhumantaṃ ni gṛhāṇa
phālaṃ kṣetreṣu sarvadā |
tat parjanyo 'bhi varṣatu
bhūmne dhānyāya kartave ||

etā u tyā adṛkṣata -
-āyatīr vedyām adhi |
prāhāgnir havyaṃ devebhyo
mantro hotā haviṣpatiḥ ||

emā agur mayobhuvo
madhor ūdhāṃsi bibhratīḥ |
tā upa pra śikṣata
duhānā akṣitaṃ payaḥ ||

iḍā stha madhupṛco
viśvarūpās tā mā viśata |
saha prāṇena tejasā
harasā balena ||