પૈપ્પલાદ-સંહિતા · અધ્યાય 19.51

ઇદાવત્સરાય પરિવત્સરાય
સંવત્સરાય પ્રતિ વેદયામ એતત્ ।
યદ્ વ્રતેષુ દુરિતં નિજગ્મિમ
દુર્હાર્દં તેન શમલેનાઞ્જ્મઃ ॥

યન્ મે વ્રતં વ્રતપતે લુલોભ -
-અહોરાત્રે સમ્ અધાતાં મ એતત્ ।
ઉદ્યન્ પુરસ્તાદ્ ભિષગ્ અસ્તુ ચન્દ્રમાઃ
સૂર્યો રશ્મિભિર્ અભિ ગૃણાત્વ્ એતત્ ॥

યદ્ વ્રતમ્ અતિપેદે
ચિત્ત્યા મનસા હૃદા ।
આદિત્યા રુદ્રાસ્ તન્ મયિ
વસવશ્ ચ સમ્ ઇન્ધતામ્ ॥

વ્રતાનિ વ્રતપતય
ઉપા કરોમ્ય્ અગ્નયે ।
સ મે દ્યુમ્નં બૃહદ્ યશો
દીર્ઘમ્ આયુષ્ કૃણોતુ મે ॥

મયોભૂર્ વાતો અભિ વાતૂસ્રા
ઊર્જસ્વતીર્ ઓષધીર્ આ રિશન્તામ્ ।
મેદસ્વતીર્ જીવધન્યા મયોભુવઃ
પદ્વતે ઽવસાય રુદ્ર મૃડ ॥

યા એકરૂપા વિશ્વરૂપાઃ સરૂપા
યાસામ્ અગ્નિર્ ઊધો વો જન્મ વેદ ।
યા અઙ્ગિરસસ્ તપસેહ ચક્રુસ્
તાભ્યઃ પર્જન્ય મહિ શર્મ યચ્છાત્ ॥

યા દેવેષુ તન્વ ઐરયન્ત
યાસાં સોમો રૂપધેયાનિ વેદ ।
તા અસ્મભ્યં બહુલાઃ પિન્વમાનાઃ
પ્રજાવતીર્ ઇન્દ્ર ગોષ્ઠે દિદિશ્યાઃ ॥

પ્રજાપતિર્ મહ્યમ્ એતા રરાણો
બહ્વીઃ સતીર્ ઉપ મે ગોષ્ઠ આકઃ ।
તાસાં વયં પ્રજયા સં સદેમ
જ્યોગ્ જીવન્તઃ શરદઃ પુરૂચીઃ ॥

અભિષ્ઠિતા ચર્કર્દીતિ
પિશઙ્ગી બહુકર્દિની ।
કર્દો હ જજ્ઞે હાલીક્ષ્ણાદ્
વ્રીહેર્ માષાદ્ અથો યવાત્ ॥

યથા ભસદ્ ધાલીક્ષ્ણસ્ય
ન સંભવતિ કર્દવે ।
એવા હલગ્ન કર્દય
નિર્ ગ્રામાન્ નિર્ દિશો જહિ ॥

યથા પરસ્વાં છર્ધતે
ગર્દભઃ કૃધુસન્દૃશઃ ।
એવા તે શર્ધતાં ભસદ્
ધાલીક્ષ્ણપર્ણ શર્ધય
વૃત્રહા શાકી શર્ધય ॥

પવીરવલ્ લાઙ્ગલં
સુશેવં સોમપિત્સરમ્ ।
તદ્ ઉત્ કૃષતિ ગામ્ અવિં
પ્રફર્વ્યં ચ પીવરીં
પ્રસ્તાવં રથવાહનમ્ ॥

શુનં વરત્રામ્ આ યચ્છ
શુનમ્ અષ્ટ્રામ્ ઉદ્ ઇઙ્ગય ।
શુનં વાહસ્ય યુક્તસ્ય-
-અષ્ટ્રયા જહિ દક્ષિણમ્ ॥

મધુમન્તં નિ ગૃહાણ
ફાલં ક્ષેત્રેષુ સર્વદા ।
તત્ પર્જન્યો ઽભિ વર્ષતુ
ભૂમ્ને ધાન્યાય કર્તવે ॥

એતા ઉ ત્યા અદૃક્ષત -
-આયતીર્ વેદ્યામ્ અધિ ।
પ્રાહાગ્નિર્ હવ્યં દેવેભ્યો
મન્ત્રો હોતા હવિષ્પતિઃ ॥

એમા અગુર્ મયોભુવો
મધોર્ ઊધાંસિ બિભ્રતીઃ ।
તા ઉપ પ્ર શિક્ષત
દુહાના અક્ષિતં પયઃ ॥

ઇડા સ્થ મધુપૃચો
વિશ્વરૂપાસ્ તા મા વિશત ।
સહ પ્રાણેન તેજસા
હરસા બલેન ॥