પૈપ્પલાદ-સંહિતા · અધ્યાય 19.21

યથા સૂર્યો નક્ષત્રાણાં
વર્ચાંસિ યુવતે દિવઃ ।
એવા સપત્નાનામ્ અહં
વર્ચ ઇન્દ્રિયમ્ આ દદે ॥

યચ્ ચ વર્ચઃ સપત્નાનાં
ભ્રાતૃવ્યેષુ ચ યદ્ યશઃ ।
તદ્ ઇન્દ્રો વૃત્રહા ધાતા
સવિતા દીધરન્ મયિ ॥

યાશ્ ચ ગાવઃ સપત્નાનાં
ભ્રાતૃવ્યેષુ ચ યદ્ વસુ ।
તન્ નિર્ જ્યેયમ્ ઇવ જીત્વા
સવિતા દીધરન્ મયિ ॥

સત્યમ્ એવ જયતુ નાનૃતં
સત્યસ્ય પન્થા ઋજુર્ અસ્તુ સાધુઃ ।
સત્યં વદન્તઃ સમિધે વિધેમ
સત્યેન દ્યાવાપૃથિવી અપ્રથેતામ્ ॥

વાગ્ભાગસ્ય ચ સત્યેન
રુદ્રસ્ય સુમનસ્યયા ।
ઇન્દ્રેણાધિબ્રુવતા વયં
વિશં પ્રાશિ વિદેમહિ ॥

યા તે રુદ્રેષુર્ આયતા
વાચિ વા તે અરંકૃતા ।
યેનેદં વિવદામહે
તસ્ય પ્રાશં ત્વં જહિ ॥

જહિ ત્વં તસ્ય પ્રાશમ્
ઉત સત્યામ્ ઉતાનૃતામ્ ।
યો અસ્માન્ ઇન્દ્ર વૃત્રહન્
વાચા પ્રાશં જિગીષતિ ॥

ઉત્ પ્રમુત્ પ્રાણ
બહ્વીહ સીદેદં પૃણ ।
ઉતોદિવ સ્મ સિઞ્ચતાત્
સમુદ્રસ્યેવ મધ્યતઃ ॥

સમુદ્રશ્ ચ શતધારઃ
સહસ્રધારો અક્ષિતઃ ।
પુરસ્તાદ્ ઇન્દ્ર આચરત્
પૂર્ણગોષ્ઠ ઇદં પૃણ ॥

ઇહોપ પૃણ સં પૃણ
વૃષ પ્રજનનાઃ કૃધિ ।
ઇહ ગાવઃ પ્ર જાયધ્વમ્
ઇહાશ્વા ઇહ પૂરુષાઃ ।
ઇહો સહસ્રદક્ષિણો
અભિ પ્રાશા નિ ષીદતુ ॥

જ્યેષ્ઠઘ્ન્યૈ નક્ષત્રાણામ્
અહ્ને રાત્ર્યા ઇદં નમઃ ।
જુહોમિ વિશ્વકર્મણે
સ શિવો મૃડયાતિ નઃ ॥

મા જ્યેષ્ઠં વધીદ્ અયમ્ અગ્ન એષાં
મૂલબર્હણં પરિ વૃણક્ત્ય્ એનમ્ ।
ગ્રાહ્યાઃ પાશાન્ વિ ચૃત પ્રજાનન્
પિતાપુત્રૌ માતરં મુઞ્ચ સર્વાન્ ॥

ઉન્ મુઞ્ચ પાશાંસ્ ત્વમ્ અગ્ન એષાં
ત્રયસ્ ત્રિભિર્ ઉત્થિતા યેભિર્ આસન્ ।
માયં હિંસીઃ પિતરં વર્ધમાનો
મા માતરં પ્ર મિનીર્ યા જનિત્રી ॥

ગ્રાહ્યાઃ પાશાન્ વિ ચૃત યે સિનન્તિ
યાં બ્રહ્મણા પરિવૃઞ્જન્તિ વેધસઃ ।
ઉન્ મુઞ્ચ પાશાંસ્ ત્વમ્ અગ્ન એષાં
ત્વજ્જાતસ્યાન્વ્ અહર્-અહર્ અસ્તુ ભદ્રમ્ ॥

નિ વર્તધ્વં માનુ ગાત-
-અસ્માન્ સિષક્ત રેવતીઃ ।
અગ્નીષોમા પુનર્વસૂ
અસ્ય વર્ધયતં રયિમ્ ॥

પુનર્ એના નિ વર્તય
પુનર્ એના ઉપા કુરુ ।
ઇન્દ્ર એના નિ યચ્છત્વ્
અગ્નિર્ એના ઉપાજતુ ॥

પરિ વો વિશ્વતો દધ
ઊર્જા ઘૃતેન પયસા ।
યે દેવાઃ કે ચ યજ્ઞિયાસ્
તે રય્યા સં સૃજન્તુ મા ॥