Paippalāda-Saṃhitā · Chapter 18.80

sam indhate amartyaṃ
havyavāhaṃ ghṛtapriyam |
sa veda nihitān nidhīn
pitṝn parāvato gatān ||

yaṃ te manthaṃ yaṃ kalambhaṃ
yam odanaṃ yan māsaṃ nipṛṇāmi te |
te te santu svadhāvanto
madhamanto ghṛtaścutaḥ ||

sarasvatīṃ yāṃ sukṛto havante
dakṣiṇā yajñam abhinakṣamāṇāḥ |
sahasrāyor mainān atra parā dā
dīrgham eṣām āyuṣ kṛṇu viśvarūpe ||

idaṃ pūrvam aparaṃ niyānaṃ
yena te pūrve pitaraḥ paretāḥ |
purogavā ye abhiśāco asya
te tvā vahantu sukṛtām ulokam ||

pṛthivīṃ tvā pṛthivyām ā veśayāmi
devo no dhātā savitāty āyuḥ |
parāpuraitā vasuvid vo astv
adhā mṛtaiḥ pitaraḥ saṃ bhavātha ||

eyam agan dakṣiṇā bhadrato no
anena dattā sudughā vayodhāḥ |
yauvane jīvām̐ api pṛñcatī jarā
parā pitṛbhya upa saṃ parāṇayāt ||

ā pra cyavethām apa taṃ nudethāṃ
yad vām abhibhā atroduḥ |
arvāñ cāvetam aghnyau tad vaśīyo
dātre pitṛṣv iha bhojanau mama ||

idaṃ pitṛbhyaḥ pra harāmi barhir
jīvaṃ devebhya uttaraṃ stṛṇāmi |
tad ā roha puruṣo medhyo bhavan
prati tva jānantu pitaraḥ paretam ||

evaṃ barhir asado medhyo bhavan
prati tva jānantu pitaraḥ paretam |
yathāparu tanvaṃ saṃ bharasva
gātrāṇi te brahmaṇā kalpayāmi ||

parṇo rājāpidhānaṃ carūṇām
ūrjo balaṃ saha ojo na āgan |
āyur jīvebhyo vidadhad
dīrghayutvāya śataśāradāya ||