Paippalāda-Saṃhitā · Chapter 18.79
etat te devaḥ savitā
vāso dadātu bhartave |
tat tvaṃ yamasya rājye
vasānas tārpyaṃ cara ||
dhānā dhenur bhavad vatso
asyās tilo 'bhavat |
tāṃ tvaṃ yamasya rājye
+'kṣitām upa jīvatāt ||
etās te asau dhānāḥ
kāmadughā bhavantu |
enīḥ śyenīr virūpāḥ sarūpās
tilavatsā upa tiṣṭhantu tvāt ||
enīr dhānā hariṇīḥ śyenīr āsu
kṛṣṇā dhānā hariṇīr dhenavas te |
tilavatsā ūrjam asmai duhānā
viśvahā santv anapasphurantīḥ ||
vaiśvānare havir idaṃ juhomy
etaṃ sāhasraṃ śatadhāram utsam |
sa bibharat pitaraṃ pitāmahaṃ
prapitāmahān bibharat pinvamānaḥ ||
utsaṃ śatadhāram akṣitaṃ
vyacamānaṃ salilasya pṛṣṭhe |
ūrjaṃ duhānam anapasphurantam
upāsatāṃ sukṛtāṃ yatra lokaḥ ||
idaṃ kasāmbu cayanena cittaṃ
tat sajātā ava paśyateta |
martyo amṛtyum amṛtatva eti
tasmai lokaṃ kṛṇuta yāvatsabandhu ||
ihaivaidhi dhanasanir
iha citta ihakratuḥ |
ihaidhi vīravattaro
vayodhā aparāhitaḥ ||
putrān pautrān abhi tarpayantīr
āpo madhumatīr imāḥ |
svadhāṃ pitṛbhyo aṃrtaṃ duhānā
āpo devīr ubhayāṃs tarpayantu ||
āpo agniṃ pra hiṇutemaṃ
yajñaṃ pitaro no juṣantām |
māsīnām ūrjam upa ye sacante
te no rayiṃ sarvavīraṃ ni yacchān ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0