Paippalāda-Saṃhitā · Chapter 18.77
śam agne paścāt tapa śaṃ purastāc
cham adharāt tapa jātavedaḥ |
ekas tredhā vihito jātavedaḥ
samyaṅ enaṃ dakṣiṇāgniḥ ||
padmānam agner vihitasya brahmaṇā
samaṅganaṃ dhehi sukṛtām ulokam |
tam agnayaḥ samiddhā ā bharantāṃ
prajāpatyaṃ medhyaṃ jātavedasaḥ |
śṛtaṃ kṛṇvanta iha mā vi cakṣaṇan ||
yajña eti vitataḥ kalpamāna
ījāno abhi lokaṃ svargam |
tam agnayaḥ sarvahutaṃ juṣantāṃ
tam asmiṃ devā jānatāṃ bhāgadheyam ||
ījānaś cittam ārukṣad agniṃ
nākasya pṛṣṭhaṃ divam utpatiṣyan |
tasmai pra bhātu nabhaso jyotiṣīmān
svargaḥ panthā vitaro devayānaḥ ||
agnir hotādhvaryuṣ ṭe bṛhaspatir
indro brahmā dakṣiṇatas te astu |
huto 'yaṃ saṃsthito yajña etu
yatra pūrvam ayanaṃ hutānām ||
apūpavān kṣīravāṃś carur eha sīdatu -
-uttabhnuvan pṛthivīṃ dyām ivopari |
lokakṛtaḥ pathikṛto yajāmahe
ye devānāṃ ghṛtabhāgā iha stha ||
apūpavān drapsavāṃś carur eha (…) ||
apūpavān dadhivāṃś carur eha (…) ||
apūpavān ghṛtavāṃś carur eha (…) ||
apūpavān māṃsavāṃś carur eha (…) ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0