Paippalāda-Saṃhitā · Chapter 18.69

apaśyaṃ yuvatīṃ nīyamānāṃ
jīvāṃ mṛtebhyaḥ pariṇīyamānām |
andhena yat tamasā prāvṛtāsīt
prākto avācīm anayaṃ tad enām ||

prajānaty aghnye jīvalokaṃ bhavantī
devānāṃ panthām anusaṃcarantī |
eṣa te gopatis taṃ juṣasva
svargaṃ lokam adhi rohayainam ||

upa dyām upa vetasam
avattaro nadīnām |
agne pittam apām asi ||

yaṃ tvam agne samadahas
tam u nir vāpayā punaḥ |
kiyāṃbuvatra rohatu
śāṇḍadūrvā vyalkaśā ||

idaṃ ta ekaṃ para u ta ekaṃ
tṛtīyena jyotiṣā saṃ viśasva |
saṃveśane tanvaś cārur edhi
priyo devānāṃ parame sadhasthe ||

ut tiṣṭha prehi pra drava-
-okaḥ kṛṇuṣva salile sadhasthe |
tatra tvaṃ pitṛbhiḥ saṃvidānaḥ
saṃ somena madasva saṃ svadhābhiḥ ||

pra cyavasva tanvaḥ saṃ bharasva
mā te gātraṃ vi hāyi mo śarīram |
mano niviṣṭamam anu saṃ pra viśasva
yatra bhūmer juṣase tatra gaccha ||

varcasā māṃ pitaraḥ somyāso
añjantu devā madhvā ghṛtena |
cakṣuṣo mā prataraṃ tārayanto
jarase mā jaradaṣṭiṃ vardhayantu ||

varcasā māṃ sam anakty agnir
medhāṃ me viṣṇur ny anakty āsani |
rayiṃ me viśve ni yacchantu devāḥ
śuddhā āpaḥ pavanair mā pūnantu ||

mitrāvaruṇā pari mām adhātām
ādityā mā svaravo vardhayantu |
varco ma indro ny anaktu hastayor
jaradaṣṭiṃ mā savitā kṛṇotu ||