Paippalāda-Saṃhitā · Chapter 18.68

idam id vā u nāparaṃ
jarasīta utāparam |
jāyā patim iva vāsasā-
-abhy enaṃ bhūma ūrṇuhi ||

abhi tvorṇomi pṛthivyā
mātur vastreṇa bhadrayā |
jīveṣu bhadraṃ tan mayi
svadhā pitṛṣv amā tava ||

agnīṣomā pathikṛtā syonaṃ
devebhyo ratnaṃ dadhatur vi lokam |
upa preṣyatāṃ pūṣaṇaṃ yo jahāty
akto yānaiḥ pathibhis tatra gacchatu ||

pūṣā tvetaś cyāvayatu pra vidvān
anaṣṭapaśur bhuvanasya gopāḥ |
sa tvaitebhyaḥ pari dadat pitṛbhyo
agnir devebhyaḥ suvidatryebhyaḥ ||

āyur viśvāyuḥ pari pātu tvā
pūṣā tvā pātu prapathe purastāt |
yatrāsate sukṛto yatra te yayus
tatra tvā devaḥ savitā dadhātu ||

idaṃ tvā vāsaḥ prathamaṃ na āgann
apaitad ūha yad ihābibhaḥ purā |
iṣṭāpūrtam anu saṃ krāma vidvān
yatra te gacchaṃ bahudhā tatra gaccha ||

imau yunajmi te vahnī
asunītaye netavai |
tābhyāṃ yamasya sādanaṃ
samitiṃ copa gacchatāt ||

agner varma pari gobhir vyayasva
saṃ prorṇuṣva pīvasā medhasā ca |
net tvā dhṛṣṇur harasā jarhṛṣāṇo
dadhṛg vidhakṣyan nyaṅkhayātai ||

dhanur hastād ādadāno mṛtasya
saha kṣatreṇa varcasā balena |
atraiva tvam iha vayaṃ suvīrā
viśvā mṛdho abhimatīr jayema ||

daṇḍaṃ hastād ādadāno mṛtasya
saha śrotreṇa varcasā balena |
samāgṛbhāya vasu bhūri puṣṭam
arvāṅ tvam ehy abhi jīvalokam ||

iyaṃ nārī patilokaṃ gṛṇānā
ni padyata upa tvā martya pretam |
dharmaṃ purāṇam anupālayantī
tasyai prajāṃ draviṇaṃ ceha dhehi ||

ud īrṣvā nāry abhi jīvalokaṃ
gātāsum enaṃ tam upa śeṣa ehi |
hastagrābhasya dadhiṣos tavedaṃ
patyur janitvam abhi saṃ babhūvitha ||