પૈપ્પલાદ-સંહિતા · અધ્યાય 18.68

ઇદમ્ ઇદ્ વા ઉ નાપરં
જરસીત ઉતાપરમ્ ।
જાયા પતિમ્ ઇવ વાસસા-
-અભ્ય્ એનં ભૂમ ઊર્ણુહિ ॥

અભિ ત્વોર્ણોમિ પૃથિવ્યા
માતુર્ વસ્ત્રેણ ભદ્રયા ।
જીવેષુ ભદ્રં તન્ મયિ
સ્વધા પિતૃષ્વ્ અમા તવ ॥

અગ્નીષોમા પથિકૃતા સ્યોનં
દેવેભ્યો રત્નં દધતુર્ વિ લોકમ્ ।
ઉપ પ્રેષ્યતાં પૂષણં યો જહાત્ય્
અક્તો યાનૈઃ પથિભિસ્ તત્ર ગચ્છતુ ॥

પૂષા ત્વેતશ્ ચ્યાવયતુ પ્ર વિદ્વાન્
અનષ્ટપશુર્ ભુવનસ્ય ગોપાઃ ।
સ ત્વૈતેભ્યઃ પરિ દદત્ પિતૃભ્યો
અગ્નિર્ દેવેભ્યઃ સુવિદત્ર્યેભ્યઃ ॥

આયુર્ વિશ્વાયુઃ પરિ પાતુ ત્વા
પૂષા ત્વા પાતુ પ્રપથે પુરસ્તાત્ ।
યત્રાસતે સુકૃતો યત્ર તે યયુસ્
તત્ર ત્વા દેવઃ સવિતા દધાતુ ॥

ઇદં ત્વા વાસઃ પ્રથમં ન આગન્ન્
અપૈતદ્ ઊહ યદ્ ઇહાબિભઃ પુરા ।
ઇષ્ટાપૂર્તમ્ અનુ સં ક્રામ વિદ્વાન્
યત્ર તે ગચ્છં બહુધા તત્ર ગચ્છ ॥

ઇમૌ યુનજ્મિ તે વહ્ની
અસુનીતયે નેતવૈ ।
તાભ્યાં યમસ્ય સાદનં
સમિતિં ચોપ ગચ્છતાત્ ॥

અગ્નેર્ વર્મ પરિ ગોભિર્ વ્યયસ્વ
સં પ્રોર્ણુષ્વ પીવસા મેધસા ચ ।
નેત્ ત્વા ધૃષ્ણુર્ હરસા જર્હૃષાણો
દધૃગ્ વિધક્ષ્યન્ ન્યઙ્ખયાતૈ ॥

ધનુર્ હસ્તાદ્ આદદાનો મૃતસ્ય
સહ ક્ષત્રેણ વર્ચસા બલેન ।
અત્રૈવ ત્વમ્ ઇહ વયં સુવીરા
વિશ્વા મૃધો અભિમતીર્ જયેમ ॥

દણ્ડં હસ્તાદ્ આદદાનો મૃતસ્ય
સહ શ્રોત્રેણ વર્ચસા બલેન ।
સમાગૃભાય વસુ ભૂરિ પુષ્ટમ્
અર્વાઙ્ ત્વમ્ એહ્ય્ અભિ જીવલોકમ્ ॥

ઇયં નારી પતિલોકં ગૃણાના
નિ પદ્યત ઉપ ત્વા મર્ત્ય પ્રેતમ્ ।
ધર્મં પુરાણમ્ અનુપાલયન્તી
તસ્યૈ પ્રજાં દ્રવિણં ચેહ ધેહિ ॥

ઉદ્ ઈર્ષ્વા નાર્ય્ અભિ જીવલોકં
ગાતાસુમ્ એનં તમ્ ઉપ શેષ એહિ ।
હસ્તગ્રાભસ્ય દધિષોસ્ તવેદં
પત્યુર્ જનિત્વમ્ અભિ સં બભૂવિથ ॥