પૈપ્પલાદ-સંહિતા · અધ્યાય 18.66

યે દસ્યવઃ પિતૃષુ પ્રવિષ્ટા
જ્ઞાતિમુખા અહુતાદશ્ ચરન્તિ ।
પરાપુરો નિપુરો યે ચરન્તિ
તાન્ અસ્માદ્ યજ્ઞાત્ પ્ર ધમન્તુ દેવાઃ ॥

સં વિશન્ત્વ્ ઇહ પિતરઃ સ્વા નઃ
સ્યોનં કૃણ્વન્તુ પ્રતિરન્ત આયુઃ ।
તેભ્યઃ શકેમ હવિષા યક્ષમાણા
જ્યોગ્ જીવન્તઃ શરદઃ પુરૂચીઃ ॥

યાં તે ધેનું નિગૃણામિ
યં વા તે ક્ષીર ઓદનમ્ ।
તેના જનસ્યાસૌ ભર્તા
યો ઽત્રાસદ્ અજીવનઃ ॥

અશ્વાવતીં પ્ર તર યા સુશેવા
ઋક્ષીકાં વા પ્રતરં નવીયઃ ।
યસ્ ત્વા જઘાન વધ્યઃ સો અસ્તુ
મા સો અન્યદ્ વિદત ભાગધેયમ્ ॥

યમઃ પરસ્તાદ્ અવરો વિવસ્વાન્
તતઃ પરો નાતિ પશ્યામ્ય્ અન્યત્ ।
યમે અધ્વરો અધિ મે નિવિષ્ટો
ભુવે વિવસ્વાન્ અન્વાતતાન ॥

અપાગૂહન્ન્ અમૃતાં મર્ત્યેભ્યઃ
કૃત્વી સુપર્ણામ્ અદધુર્ વિવસ્વતે ।
ઉતાશ્વિનાવ્ અભરદ્ યત્ તદ્ આસીદ્
અજહાદ્ ઉ દ્વા મિથુના સરણ્યૂઃ ॥

યે નિખાતા યે પરોપ્તા
યે દગ્ધા યે ચોદ્ધિતાઃ ।
સર્વાંસ્ તાન્ અગ્ન આ વહ
પિતૄન્ હવિષે અત્તવે ॥

યે ચેહ પિતરો યે ચેહ ન
યાંશ્ ચ વિદ્મ યાઁ ઉ ચ ન પ્રવિદ્મ ।
ત્વં વેત્થ યદિ તે જાતવેદઃ
સ્વધાભિર્ યજ્ઞં સુકૃતં જુષન્તામ્ ॥

શં તપ માતિ તપો
અગ્ને મા તન્વં તપઃ ।
વનેષુ શુષ્મો અસ્તુ તે
પૃથિવ્યામ્ અસ્તુ યદ્ ધરઃ ॥

દદામ્ય્ અસ્મા અવસાનમ્ એતદ્
ય એષ આગન્ મમ ચેદ્ અભૂદ્ ઇહ ।
યમશ્ ચિકિત્વાન્ પ્રત્ય્ એતદ્ આહ
મમૈષ રાય ઉપ તિષ્ઠતામ્ ઇહ ॥