Paippalāda-Saṃhitā · Chapter 18.57

o cit sakhāyaṃ sakhyā vavṛtyāṃ
tiraḥ purū cid arṇavaṃ jaganvān |
pitur napātam ā dadhīta vedhā
adhi kṣami prataraṃ dīdhyānaḥ ||

na te sakhā sakhyaṃ vaṣṭy etat
salakṣmā yad viṣurūpā bhavāti |
sahas putrāso asurasya vīrā
divo dhartāra urviyā pari khyan ||

uśanti ghā te amṛtāsa etad
ekasya cit tyajasaṃ martyasya |
ni te mano manasi dhāyy asme
janyuḥ patis tanvam ā viviśyāḥ ||

na yat purā cakṛmā kad dha nūnam
ṛtaṃ vadanto anṛtaṃ rapema |
gandharvo apsv apyā ca yoṣā
sā no nābhiḥ paramaṃ jātaman nau ||

garbhe nū nau janitā dampatī kar
devas tvaṣṭā savitā viśvarūpaḥ |
nakir asya pra minanti vratāni
veda nāv asya pṛthivī uta dyauḥ ||

ko adya yuṅkte dhuri gā ṛtasya
śimīvato bhāmino durhaṇāyūn |
āsanniṣūn hṛtasvaso mayobhūn
ya eṣāṃ bhṛtyām ṛṇadhat sa jīvāt ||

ko asya veda prathamasyāhnaḥ
ka īṃ dadarśa ka iha pra vocat |
bṛhan mitrasya varuṇasya dhāma
kad u brava āhano vīcyā nṝn ||

yamasya mā yamyaṃ kāma āgan
samāne yonau sahaśeyyāya |
jāyeva patye tanvaṃ riricyāṃ
vi cid vṛheva rathyeva cakrā ||

na tiṣṭhati na ni miṣanty ete
devānāṃ spaśa iha ye caranti |
anyena mad āhano yāhi bhūyaṃ
tena vi vṛha rathyeva cakrā ||

rātrībhir asmā ahabhir daśasyet
sūryasya cakṣur muhur un mimīyāt |
divā pṛthivyā mithunā sabandhū
yamīr yamasya vivṛhed ajāmi ||