Paippalāda-Saṃhitā · Chapter 18.18

avācīnān ava jahi-
-indra vajreṇa bāhumān |
adhā sapatnān mamakān
agnes tejobhir ā dade ||

udyan tvaṃ deva sūrya
sapatnān me +'dharān kṛṇu |
avainān aśmanā jahi
te yantv adhamaṃ tamaḥ ||

vatso virājo vṛṣabho matīnām
ā ruroha śukrapṛṣṭho 'ntarikṣam |
ghṛteṇārkam abhy arcanti vatsaṃ
brahma santaṃ brahmaṇā vardhayantu ||

divaṃ ca roha pṛthivīṃ ca roha
rāṣṭraṃ ca roha draviṇaṃ ca roha |
prajāṃ ca rohāmṛtaṃ ca roha
rohitena tanvaṃ saṃ spṛśasva ||

ye devā rāṣṭrabhṛto
'bhito yanti sūryam |
tebhiṣ ṭe rohitaḥ saṃvidāno
rāṣṭraṃ dadhātu sumanasyamānaḥ ||

ut tvā yajñā brahmapūtā vahanty
adhvagato harayas tvā vahanti |
tiraḥ samudram ati rocase 'rṇavam ||

rohite dyāvāpṛthivī adhi śrite
vasujiti gojiti saṃjiti saṃdhanājiti |
sahasraṃ yasya draviṇāni sapta ca
voceyaṃ te nābhiṃ bhuvanasyādhi majmani ||

yaśā yāsi pradiśo diśo 'nu
yaśāḥ paśūnām uta carṣaṇīnām |
yaśāḥ pṛthivyā adityā upasthe
'ham asmi saviteva cāruḥ ||

amutra sann iha vettha-
-iha san tāni paśyati |
itaḥ paśyanti rocanaṃ
divi sūryaṃ vipaścitam ||

devo devam arcayaty
antaś caraty arṇave |
samānam agnim indhate
taṃ viduḥ kavayaḥ pare ||