Paippalāda-Saṃhitā · Chapter 18.17

yaṃ tvā pṛṣatī rathe
pṛṣṭir vahati rohitaḥ |
śubhā yāsi riṇann apaḥ |
tenemaṃ brahmaṇaspate
rohaṃ rohayottamam ||

anuvratā rohiṇī rohitasya
sūriḥ suparṇā bṛhatī suvarcāḥ |
tayā vājān viśvarūpāṃ jayema
tayā viśyāḥ pṛtanā abhi ṣyāma ||

idaṃ sado rohiṇī rohitasya-
-asau panthāḥ pṛṣatī yena yāti |
tāṃ gandharvāḥ kaśyapā un nayanti
tāṃ rakṣanti kavayo 'pramādam ||

sūryasyāśvā harayaḥ ketumantaḥ
sadā vahanty amṛtāḥ sukhaṃ ratham |
ghṛtapāvā rohito bhrājamāno
divaṃ devaḥ pṛṣatīm ā viveṣa ||

yo rohito vṛṣabhas tigmaśṛṅgaḥ
pary agniṃ pari sūryaṃ babhūva |
yo viṣṭabhnāti pṛthivīṃ divaṃ ca
tasmād devā adhi sṛṣṭīḥ sṛjante ||

rohito divam āruhan
mahatas pary arṇavāt |
sarvā ruroha rohito ruhaḥ ||

vi mimīṣva payasvatīṃ ghṛtācīṃ
devānāṃ dhenur anapaspṛg eṣā |
indraḥ somaṃ pibatu kṣemo astv
agniḥ pra stautu vi mṛdho nudasva ||

samiddho agniḥ samidhāno
ghṛtavṛddho ghṛtāhutaḥ |
abhīṣāḍ viśvāṣāḍ agniḥ
sapatnān hantu ye mama ||

hantv enān pra dahatv
agnir yo naḥ pṛtanyati |
kravyādāgninā vayaṃ
sapatnān pra dahāmasi ||

agne sapatnam adharaṃ pādayāsmad
vyathayā sajātam utpipānaṃ bṛhaspate |
indrāgnī mitrāvaruṇāv
adhare padyantām apratimanyūyamānāḥ ||