પૈપ્પલાદ-સંહિતા · અધ્યાય 18.18

અવાચીનાન્ અવ જહિ-
-ઇન્દ્ર વજ્રેણ બાહુમાન્ ।
અધા સપત્નાન્ મમકાન્
અગ્નેસ્ તેજોભિર્ આ દદે ॥

ઉદ્યન્ ત્વં દેવ સૂર્ય
સપત્નાન્ મે +ઽધરાન્ કૃણુ ।
અવૈનાન્ અશ્મના જહિ
તે યન્ત્વ્ અધમં તમઃ ॥

વત્સો વિરાજો વૃષભો મતીનામ્
આ રુરોહ શુક્રપૃષ્ઠો ઽન્તરિક્ષમ્ ।
ઘૃતેણાર્કમ્ અભ્ય્ અર્ચન્તિ વત્સં
બ્રહ્મ સન્તં બ્રહ્મણા વર્ધયન્તુ ॥

દિવં ચ રોહ પૃથિવીં ચ રોહ
રાષ્ટ્રં ચ રોહ દ્રવિણં ચ રોહ ।
પ્રજાં ચ રોહામૃતં ચ રોહ
રોહિતેન તન્વં સં સ્પૃશસ્વ ॥

યે દેવા રાષ્ટ્રભૃતો
ઽભિતો યન્તિ સૂર્યમ્ ।
તેભિષ્ ટે રોહિતઃ સંવિદાનો
રાષ્ટ્રં દધાતુ સુમનસ્યમાનઃ ॥

ઉત્ ત્વા યજ્ઞા બ્રહ્મપૂતા વહન્ત્ય્
અધ્વગતો હરયસ્ ત્વા વહન્તિ ।
તિરઃ સમુદ્રમ્ અતિ રોચસે ઽર્ણવમ્ ॥

રોહિતે દ્યાવાપૃથિવી અધિ શ્રિતે
વસુજિતિ ગોજિતિ સંજિતિ સંધનાજિતિ ।
સહસ્રં યસ્ય દ્રવિણાનિ સપ્ત ચ
વોચેયં તે નાભિં ભુવનસ્યાધિ મજ્મનિ ॥

યશા યાસિ પ્રદિશો દિશો ઽનુ
યશાઃ પશૂનામ્ ઉત ચર્ષણીનામ્ ।
યશાઃ પૃથિવ્યા અદિત્યા ઉપસ્થે
ઽહમ્ અસ્મિ સવિતેવ ચારુઃ ॥

અમુત્ર સન્ન્ ઇહ વેત્થ-
-ઇહ સન્ તાનિ પશ્યતિ ।
ઇતઃ પશ્યન્તિ રોચનં
દિવિ સૂર્યં વિપશ્ચિતમ્ ॥

દેવો દેવમ્ અર્ચયત્ય્
અન્તશ્ ચરત્ય્ અર્ણવે ।
સમાનમ્ અગ્નિમ્ ઇન્ધતે
તં વિદુઃ કવયઃ પરે ॥