પૈપ્પલાદ-સંહિતા · અધ્યાય 18.17

યં ત્વા પૃષતી રથે
પૃષ્ટિર્ વહતિ રોહિતઃ ।
શુભા યાસિ રિણન્ન્ અપઃ ।
તેનેમં બ્રહ્મણસ્પતે
રોહં રોહયોત્તમમ્ ॥

અનુવ્રતા રોહિણી રોહિતસ્ય
સૂરિઃ સુપર્ણા બૃહતી સુવર્ચાઃ ।
તયા વાજાન્ વિશ્વરૂપાં જયેમ
તયા વિશ્યાઃ પૃતના અભિ ષ્યામ ॥

ઇદં સદો રોહિણી રોહિતસ્ય-
-અસૌ પન્થાઃ પૃષતી યેન યાતિ ।
તાં ગન્ધર્વાઃ કશ્યપા ઉન્ નયન્તિ
તાં રક્ષન્તિ કવયો ઽપ્રમાદમ્ ॥

સૂર્યસ્યાશ્વા હરયઃ કેતુમન્તઃ
સદા વહન્ત્ય્ અમૃતાઃ સુખં રથમ્ ।
ઘૃતપાવા રોહિતો ભ્રાજમાનો
દિવં દેવઃ પૃષતીમ્ આ વિવેષ ॥

યો રોહિતો વૃષભસ્ તિગ્મશૃઙ્ગઃ
પર્ય્ અગ્નિં પરિ સૂર્યં બભૂવ ।
યો વિષ્ટભ્નાતિ પૃથિવીં દિવં ચ
તસ્માદ્ દેવા અધિ સૃષ્ટીઃ સૃજન્તે ॥

રોહિતો દિવમ્ આરુહન્
મહતસ્ પર્ય્ અર્ણવાત્ ।
સર્વા રુરોહ રોહિતો રુહઃ ॥

વિ મિમીષ્વ પયસ્વતીં ઘૃતાચીં
દેવાનાં ધેનુર્ અનપસ્પૃગ્ એષા ।
ઇન્દ્રઃ સોમં પિબતુ ક્ષેમો અસ્ત્વ્
અગ્નિઃ પ્ર સ્તૌતુ વિ મૃધો નુદસ્વ ॥

સમિદ્ધો અગ્નિઃ સમિધાનો
ઘૃતવૃદ્ધો ઘૃતાહુતઃ ।
અભીષાડ્ વિશ્વાષાડ્ અગ્નિઃ
સપત્નાન્ હન્તુ યે મમ ॥

હન્ત્વ્ એનાન્ પ્ર દહત્વ્
અગ્નિર્ યો નઃ પૃતન્યતિ ।
ક્રવ્યાદાગ્નિના વયં
સપત્નાન્ પ્ર દહામસિ ॥

અગ્ને સપત્નમ્ અધરં પાદયાસ્મદ્
વ્યથયા સજાતમ્ ઉત્પિપાનં બૃહસ્પતે ।
ઇન્દ્રાગ્ની મિત્રાવરુણાવ્
અધરે પદ્યન્તામ્ અપ્રતિમન્યૂયમાનાઃ ॥