Paippalāda-Saṃhitā · Chapter 18.14
amo 'ham asmi sā tvaṃ
dyaur ahaṃ pṛthivī tvam |
mano 'ham asmi vāk tvaṃ
tāv iha saṃ bhavāva
prajām ā janayāvahai ||
janīyanti no agravaḥ
putrīyanti sudānavaḥ |
ariṣṭāsaḥ sacemahi
bṛhate vājasātaye ||
ye pitaro vadhūdarśā
imaṃ vahatum āgaman |
te asyai vadhvai saṃpatnyai
prajāvac charma yacchantu ||
yedaṃ pūrvāgan raśanāyamānā
prajām asyai draviṇaṃ ceha dattvā |
tāṃ vahantv agatasyābhi panthāṃ
virāḍ iyaṃ suprajā aty ajaiṣīt ||
pra budhyasva subudhā budhyamānā
dīrghāyutvāya śataśāradāya |
gṛhān prehi sumanasyamānā
dīrghaṃ ta āyuḥ savitā kṛṇotu ||
vi te muñcāmi raśanāṃ vi raśmīn
vi yoktrāṇi paricartanāni ca |
ariṣṭāsmin jyotiṣi
śivā gṛhapatau bhava ||
syonā bhava śvaśurebhyaḥ
syonā patye gṛhebhyaḥ |
syonāsyai sarvasyai viśe
syonā puṣṭāyaiṣāṃ bhava ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0