Scripture Library

Paippalāda-Saṃhitā · Chapter 18.13

18.13.1

yat te prajāyāṃ paśuṣu
yad vā gṛheṣu niṣṭhitam
aghakṛdbhir aghaṃ kṛtam |
agniṣ ṭvā tasmād enasaḥ
savitā ca pra muñcatām ||

18.13.2

iyaṃ nāry upa brūte
pūlpāny āvapantikā |
dīrghāyur astu me patir
edhantāṃ pitaro mama ||

18.13.3

ihemāv indra saṃ nuda
cakravākeva dampatī |
prajāvantau svastakau
dīrgham āyur vy aśnutām ||

18.13.4

yad āsandyām upadhāne
yad vopavāsane kṛtam |
vivāhe kṛtyāṃ yāṃ cakrur
āsnāne tāṃ ni dadhmasi ||

18.13.5

yad duṣkṛtaṃ yac chamalaṃ
vivāhe vahatau ca yat |
tat saṃbhalasya kambale
mṛjmahe duritaṃ vayam ||

18.13.6

saṃbhale malaṃ sādayitvā
kambale duritaṃ vayam |
abhūma yajñiyāḥ śuddhāḥ
pra ṇa āyūṃṣi tāriṣan ||

18.13.7

yā me priyatamā tanūḥ
sā me bibhāya vāsasaḥ |
tasyāgre tvaṃ vanaspate
nīviṃ kṛṇuṣva mā vayaṃ riśāma ||

18.13.8

kṛtrimaḥ kaṅkataḥ śatadan ya eṣaḥ |
apāsyāḥ keśyaṃ malam
apa śīrṣaṇyaṃ likhāt ||

18.13.9

aṅgādaṅgād yūyam asyā
apa yakṣmaṃ ni dhattana |
tan mā prāpat pṛthivīṃ mota devān
divaṃ mā prāpan morv antarikṣam |
apo mā prāpan malam etad agne
yamaṃ mā prāpat pitṝṃś ca sarvān ||

18.13.10

saṃ tvā nahyāmi payasā pṛthivyāḥ
saṃ tvā nahyāmi payasauṣadhīnām |
saṃ tvā nahyāmi prajayā dhanena
sā saṃnaddhā sanuhi vājam emam ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0