પૈપ્પલાદ-સંહિતા · અધ્યાય 18.14

અમો ઽહમ્ અસ્મિ સા ત્વં
દ્યૌર્ અહં પૃથિવી ત્વમ્ ।
મનો ઽહમ્ અસ્મિ વાક્ ત્વં
તાવ્ ઇહ સં ભવાવ
પ્રજામ્ આ જનયાવહૈ ॥

જનીયન્તિ નો અગ્રવઃ
પુત્રીયન્તિ સુદાનવઃ ।
અરિષ્ટાસઃ સચેમહિ
બૃહતે વાજસાતયે ॥

યે પિતરો વધૂદર્શા
ઇમં વહતુમ્ આગમન્ ।
તે અસ્યૈ વધ્વૈ સંપત્ન્યૈ
પ્રજાવચ્ છર્મ યચ્છન્તુ ॥

યેદં પૂર્વાગન્ રશનાયમાના
પ્રજામ્ અસ્યૈ દ્રવિણં ચેહ દત્ત્વા ।
તાં વહન્ત્વ્ અગતસ્યાભિ પન્થાં
વિરાડ્ ઇયં સુપ્રજા અત્ય્ અજૈષીત્ ॥

પ્ર બુધ્યસ્વ સુબુધા બુધ્યમાના
દીર્ઘાયુત્વાય શતશારદાય ।
ગૃહાન્ પ્રેહિ સુમનસ્યમાના
દીર્ઘં ત આયુઃ સવિતા કૃણોતુ ॥

વિ તે મુઞ્ચામિ રશનાં વિ રશ્મીન્
વિ યોક્ત્રાણિ પરિચર્તનાનિ ચ ।
અરિષ્ટાસ્મિન્ જ્યોતિષિ
શિવા ગૃહપતૌ ભવ ॥

સ્યોના ભવ શ્વશુરેભ્યઃ
સ્યોના પત્યે ગૃહેભ્યઃ ।
સ્યોનાસ્યૈ સર્વસ્યૈ વિશે
સ્યોના પુષ્ટાયૈષાં ભવ ॥