પૈપ્પલાદ-સંહિતા · અધ્યાય 18.13

યત્ તે પ્રજાયાં પશુષુ
યદ્ વા ગૃહેષુ નિષ્ઠિતમ્
અઘકૃદ્ભિર્ અઘં કૃતમ્ ।
અગ્નિષ્ ટ્વા તસ્માદ્ એનસઃ
સવિતા ચ પ્ર મુઞ્ચતામ્ ॥

ઇયં નાર્ય્ ઉપ બ્રૂતે
પૂલ્પાન્ય્ આવપન્તિકા ।
દીર્ઘાયુર્ અસ્તુ મે પતિર્
એધન્તાં પિતરો મમ ॥

ઇહેમાવ્ ઇન્દ્ર સં નુદ
ચક્રવાકેવ દમ્પતી ।
પ્રજાવન્તૌ સ્વસ્તકૌ
દીર્ઘમ્ આયુર્ વ્ય્ અશ્નુતામ્ ॥

યદ્ આસન્દ્યામ્ ઉપધાને
યદ્ વોપવાસને કૃતમ્ ।
વિવાહે કૃત્યાં યાં ચક્રુર્
આસ્નાને તાં નિ દધ્મસિ ॥

યદ્ દુષ્કૃતં યચ્ છમલં
વિવાહે વહતૌ ચ યત્ ।
તત્ સંભલસ્ય કમ્બલે
મૃજ્મહે દુરિતં વયમ્ ॥

સંભલે મલં સાદયિત્વા
કમ્બલે દુરિતં વયમ્ ।
અભૂમ યજ્ઞિયાઃ શુદ્ધાઃ
પ્ર ણ આયૂંષિ તારિષન્ ॥

યા મે પ્રિયતમા તનૂઃ
સા મે બિભાય વાસસઃ ।
તસ્યાગ્રે ત્વં વનસ્પતે
નીવિં કૃણુષ્વ મા વયં રિશામ ॥

કૃત્રિમઃ કઙ્કતઃ શતદન્ ય એષઃ ।
અપાસ્યાઃ કેશ્યં મલમ્
અપ શીર્ષણ્યં લિખાત્ ॥

અઙ્ગાદઙ્ગાદ્ યૂયમ્ અસ્યા
અપ યક્ષ્મં નિ ધત્તન ।
તન્ મા પ્રાપત્ પૃથિવીં મોત દેવાન્
દિવં મા પ્રાપન્ મોર્વ્ અન્તરિક્ષમ્ ।
અપો મા પ્રાપન્ મલમ્ એતદ્ અગ્ને
યમં મા પ્રાપત્ પિતૄંશ્ ચ સર્વાન્ ॥

સં ત્વા નહ્યામિ પયસા પૃથિવ્યાઃ
સં ત્વા નહ્યામિ પયસૌષધીનામ્ ।
સં ત્વા નહ્યામિ પ્રજયા ધનેન
સા સંનદ્ધા સનુહિ વાજમ્ એમમ્ ॥